УИХ-ын Хүний хөгжил, нийгмийн бодлогын байнгын хорооны өнөөдрийн хуралдаанаар УИХ-ын гишүүн Т.Мөнхсайхан, М.Мандхай, Л.Энх-Амгалан нарын өргөн мэдүүлсэн Сургуулийн орчны эрүүл мэнд, аюулгүй байдлын тухай хуулийн төсөл болон хамт өргөн мэдүүлсэн хуулийн төслүүдийн хэлэлцэх эсэх шатны хэлэлцүүлгийг хийж дэмжлээ.

УИХ-ын гишүүн Т.Мөнхсайхан хуулийн төслийг танилцуулахдаа, “Аливаа улс, үндэстний баялаг нь эрүүл иргэн юм. Манай улс 0-17 насны 1,3 сая хүүхэд багачуудтай. Энэ нь нийт хүн амын 36,2 хувийг эзэлж байна. Өнөөдөр сургуулийн орчинд тодорхой шийдэлгүй олон асуудал байгаагийн заримаас дурдвал, сүрьеэ, шүдний болон амьсгал, хоол боловсруулах замын өвчлөл, осол гэмтэл зэргийг нэрлэж болно.

Сүүлийн таван жилд 6-18 насны 250 мянга орчим хүүхэд осол гэмтэлд өртсөний 13,5 хувь нь сургуулийн орчинд бэртсэн. Сургуулийн орчинд зам тээврийн осол, амиа хорлох, хүчирхийлэл өсөх хандлагатай байна. Үе тэнгийнхний дээрэлхэлт тодорхой зохицуулагдаагүй байна. Дээрэлхэлт зөвхөн бие махбодын хүчирхийллээр хязгаарлагдахгүй сэтгэл зүйн дарамт, доромжлол, гадуурхалт, цахим орчны хүчирхийлэл зэрэг олон хэлбэрээр илэрч байна.

Хууль хэрэгжсэнээр ялгаварлан гадуурхахгүй байх, тэгш хандах, хүмүүнлэг, энэрэнгүй хандах, суралцагчийн хувийн болон эмзэг мэдээллийн нууцлалыг чанд хадгалах, суралцагчийн эрх, ашиг, сонирхлыг нэн тэргүүнд тавих, эрүүл аюулгүй эрүүл мэндийн тусламж, үйлчилгээг үзүүлэх боломж нээгдэх юм” гэлээ.