Нийслэлийн Засаг дарга бөгөөд Улаанбаатар хотын захирагч Х.Нямбаатар "Туулын хурдны зам" төслөөс болж суудал өнцөгдөөд удаж байгаа. Ганц үүгээр ч тогтохгүй авилга хорооллыг босгосон, Сэлбэ, Дунд голын амийг тасалсан, Урт цагааны гудамжийг цементэн шал болгосон гээд яривал дуусахгүй.
Аргаа барсан нийслэлийнхэн эцэст нь хатан Туулаа аврах хөдөлгөөн өрнүүлээд хотын төв талбайд тэмцэл өрнүүлж эхэллээ. Төслийн ТЭЗҮ-ийг гүйцэтгэхэд байгаль орчны шинжээчээр оролцсон гэх хоёр ч мэргэжилтэн "Бид энэ төсөл дээр ажиллаагүй, бичиг баримтыг хуурамчаар үйлдсэн байна" гэх мэдээллийг хийгээд арагш сууснаас үзвэл ард нь багагүй "но" байгаа нь тодорхой.
Гэвч "чоно борооноор" гэдэг болж хотын мээрийг тойрсон төсөл, тендерийн асуудал шийдэгдээгүй байхад ар шил дээр "исгэрээд зогсох" нэг бус хүн гарч ирж байгаа бололтой. Тэдгээр нөхдийн дундаас хамгийн сонирхолтой буюу нөлөө бүхий нь УИХ-ын гишүүн, Эдийн засгийн хөгжлийн сайд Ж.Энхбаярын нэр дурьдагдах болов. Мань хүн хотын даргын албан тушаалд суухын тулд гишүүнийхээ мандатыг орхиод, сайдын сэнтийгээс буухад ч бэлэн байгаа гэх яриа чих дэлсэж эхэллээ. Харамсалтай нь ийм үзэгдэл эрх баригч МАН-ын хувьд анхных нь биш.
Өмнөх парламентын үед Сонгинохайрханаас сонгогдсон Д.Сумъяабазар гишүүн анх удаа "Нийслэлийн нам сонгуульд ялав" гээд УИХ-ын гишүүнийхээ мандатыг өгөөд хотын даргаар бууж байсан түүхтэй. Араас нь Х.Нямбаатар Хууль зүй, дотоод хэргийн сайдын суудлаа суллаж, УИХ-ын гишүүний бүрэн эрхээ тайлж хаяад Нийслэлийн Засаг даргын суудалд буусан.
Ажаад байхад энэ мэт томилгоонууд дээр улс төрийн болон албан тушаалын эрэмбэ дараа гэх зүйл нэг их үйлчилдэггүй бололтой юм. Хамгийн гол нь нийслэл дээр хэрэгжиж байгаа томоохон төсөл, хөтөлбөрүүд МАН-ын дарга нарын шуналыг юу юунаас илүү татдаг аж.
Ялангуяа сүүлийн өдрүүдэд "Х.Нямбаатар хурдны зам барихгүй шүү. Хурдны зам барих нэрээр ирэх сонгуулийнхаа мөнгийг босгож байгаа юм" гэдэг яриа, хар сэр олон нийтийн сүлжээгээр явж байна. Километр нь 70 тэрбумын өртөгтэй /1 метр нь 70 сая төгрөг/ зам гүүрийн ажил гэдэг тоглоом биш. Гэхдээ нийслэлчүүдийн хувьд тооноос илүү байгаль орчны асуудал нь тулгамдсан асуудал болоод байгаа.
Харин эрх баригч намын хувьд энэ зам дээр хаяж байгаа 2,3 их наядын төсөвт өртөг "нүд унагах" ганц шалтгаан болу байгаа бололтой. Хэрвээ бэлэн болчихсон ийм төсөл, энэ хэмжээний төсөв байгаагүйсэн бол УИХ-ын гишүүн, Эдийн засгийн хөгжлийн сайд хүн энэ суудал руу дуртай ч, дургүй ч бай гулсана гэж байх уу?
Өмнө нь Л.Оюун-Эрдэнийн Засгийн газарт сайдаар ажиллаж байхдаа бүхэл бүтэн яамыг нүүлгээд Дарханд, өөрийнхөө сонгогдсон тойрогт аваачиж чадсан хүнд энэ зэргийн "эр хар зориг" ч гэсэн юу ч биш л байх даа.
