Монгол Улс эзнээ шилгээчхээд эмээлээ гэдсэндээ авчхаад туйлж яваа морь шиг болжээ. Адуу мал их ярьдаг болсон болохоор ийм зүйрлэл хэллээ. Ойлгох биз. Зүгээр л Монгол Улс де-факто эзэнгүй, удирдлагагүй болоод удаж байна. Уул нь МАН сонгуульд ялсан. Тэд засаглах ёстой. Гаднаас нь харахад тэгж байна. УИХ-ын дарга Н.Учрал байна. Тэр бас МАН-ын дарга. Ерөнхий сайд Г.Занданшатар байна. Тэгвэл Н.Учрал УИХ-аа удирдаж чадахгүй, чадамжгүй болжээ. Гол сөрөг нам нь түүнийг хүлээн зөвшөөрөхгүй, дээрээс нь бараг дөчөөд гишүүн сөрөг намын бодлогыг дэмжиж байна. Иймээс Н.Учрал яг жинхэнэдээ УИХ-ын даргаас аль хэзээний огцорчихсон гэсэн үг. Тэгвэл Засаг яасан гэсэн үг вэ. Н.Учрал огцорчихвол Ерөнхий сайдаа хийнэ. Намын дарга тэгэхээс ч өөр яах вэ. Хэзээ мөдгүй ажлаа өгөх нь тодорхой болчихсон Ерөнхий сайд Г.Занданшатар бас ажил явуулах чадамжгүй болжээ. Огцрох нь тодорхой хүн юу ч хийх юм билээ. Бас огцрох гэж байгаа Ерөнхий сайдын үгэнд ордог хүн ч гэж хаана байх вэ.

Намын дарга Н.Учрал намаа удирдаад энэ бүгдийг давна гэж горьдож болох ч бүх ажлыг нь Ерөнхийлөгч хийж байгаа гэж огцорсон сайд Л.Оюун-Эрдэнэ хэлсэн.Ингээд явж явж ганц Ерөнхийлөгч л бүгдийг нь мэдэж байгаа гэж болох ч хуулиараа энэ бүгд хориотой. Яг жинхэнэдээ Монгол Улс удирдлагагүй болчхоод байгаа юм биш үү.

Өдрийн сонин