Баянзүрх дүүргийн ИТХ дахь Ардчилсан намын бүлгээс өнөөдөр /2026.3.4/ Ардчилсан намын дарга О.Цогтгэрэлд шаардлага хүргүүлэх талаар мэдээлэл хийлээ.

Баянзүрх дүүргийн ИТХ-ын төлөөлөгч Б.Одбаяр:

-Шаардлагын агуулга нь намын шинэчилсэн бүртгэлтэй холбоотой асуудал. “Нээлттэй, цэгцтэй” уриан дор явагдаж буй Ардчилсан намын шинэчилсэн бүртгэл улс орон даяар хоёрдугаар сарын 1-нээс эхэлсэн, энэ сарын 10-ны 17:00 цагт дуусна.

Бүртгэл дуусахад долоохон өдөр үлдсэн энэ үед тодорхойгүй асуудлууд үүсэж байна. Ардчилсан намд элсэх, гишүүнчлэлээ шинэчлэх үйл ажиллагаа нь хэн бүхэнд нээлттэй бөгөөд агуулгын хувьд зөв зүйтэй ажил гэж бид үзэж байгаа. Гэвч сайн ажлын хажуугаар сөрөг үзэгдэл гарч болзошгүй байна.

Тухайлбал, намын үүд хаалга нээлттэй байгааг далимдуулан МАН болон бусад улс төрийн нам, эвслүүд зохион байгуулалттайгаар гишүүдээ Ардчилсан намын бүртгэлд хамруулах оролдлого хийж байгаа тухай мэдээлэл ирсэн.

Бид Баянзүрх дүүрэгтээ шинэчилсэн бүртгэлийг хариуцсан хороод дээрээ зохион байгуулж, намын гишүүнчлэлийг нэмэгдүүлэх, ардчиллыг дэмжигч иргэдийг элсүүлэх чиглэлээр ажиллаж байна. Гэвч ийм зохион байгуулалттай оролдлого нь намын суурь дархлаанд сөргөөр нөлөөлөх, улмаар дотоод эв нэгдэлд эрсдэл учруулж болзошгүй гэж үзэж байгаа.

Шинэчилсэн бүртгэл нь ердөө гурван минутын дотор хийгдэх боломжтой, хялбар процесс байгаа нь нээлттэй байдлыг илэрхийлж буй ч үүнийг буруугаар ашиглах нөхцөл бүрдсэн. Түүнчлэн нам доторх зарим гишүүд ч энэхүү нөхцөл байдлыг ашиглан талцал, зөрчил үүсгэх оролдлого хийж байгаа гэх хардлага байна. Иймд намын шинэчлэлийн үйл явц нь бусад намын “хүч зузаатгал” болж хувирахгүй байх, гишүүнчлэлийн бүртгэлийг илүү нягт, хяналттай зохион байгуулах шаардлагатай" гэв.