Ерөнхий сайд Г.Занданшатар өнөөдөр болж буй Монгол Ардын Намын Бага хурлын хуралдаанд Монгол Улсын нийгэм, эдийн засгийн голлох үзүүлэлтүүдийн талаар илтгэл танилцуулжээ.

Тэрбээр "Монгол Улсын эдийн засгийн өсөлт 2025 оны эцсээр 6.8 хувийн үзүүлэлтэй гарсныг Үндэсний статистикийн хорооноос мэдээллээ. Тоо бол баримт юм. Энэ тоо баримтыг задалж үзвэл Монгол Улсын эдийн засгийн бүх салбарт бодит тоо, биет гүйцэтгэл бүх салбарт өссөн үзүүлэлт гарсан нь манай Засгийн газрын бодлого, үйл ажиллагааны зохих үр дүнгийн илэрхийлэл төдийгүй ирэх цаг хугацаанд итгэл төгс ажиллах урам зориг, эрч хүчийг өгч байгааг онцлон тэмдэглэхийг хүсэж байна.

Хөдөө аж ахуйн салбар эдийн засгийн өсөлтийн 40 хувь буюу 2.8 хувийг эзэлсэн байна. Түүний дараа Оюутолгой төслийн үр өгөөж эдийн засгийн өсөлтийн 1.1 хувийг бүрдүүллээ. Тиймээс Монголын эдийн засаг зөв чиглэлд, зөв голдиролдоо орж байна гэж үзвэл зохино.

Мөн аялал жуулчлалаас олсон орлого 700 сая ам.долларт хүрсэн нь эдийн засгийг өсгөх чухал тулгуур болж байна. Түүнчлэн 90 сая тонн нүүрс экспортолж, түүхэн дээд хэмжээг тогтоов. 2025 оны эхний хагаст нийт экспортын орлого 5.4 тэрбум ам. доллар байсан бол оны эцэст 15.7 тэрбум ам.доллар болж 3 дахин өслөө.

Уул уурхайн өсөлтөөс гадна аж үйлдвэрийн салбарт буюу тэр дундаа зөвхөн самнасан ноолуурын экспорт 3.8 дахин өсөж 335 сая ам.долларт хүрсэн байна. Дараагийн шатанд нэмүү өртөг шингээж, экспортын хэмжээ нэмэгдүүлэн эдийн засгаа төрөлжүүлэн хөгжүүлэх боломж нээгдэж байгааг харууллаа.

Валютын нөөц ч 7 тэрбум ам.доллар болж, өнгөрсөн оныхоос 1.5 тэрбум ам.доллароор өссөн үзүүлэлт гарлаа.

Манай Засгийн газар эдийн засгийн өсөлтийн өгөөжийг өрх бүрд хүргэх зорилготой цэгцрэх 300 хоногийн төлөвлөгөөг батлан хэрэгжүүлж эхлээд байна. Өөрөөр хэлбэл, эдийн засгийн өсөлтөө иргэн бүрдээ хүртээсэн Засгийн газар байхын тулд бодлогын шат дараалсан шинэчлэлийг хэрэгжүүлнэ" гэжээ.

Түүнчлэн тэрбээр илтгэлдээ, "Бидний жинхэнэ дайсан бол өрсөлдөгч нам биш. Бидний жинхэнэ дайсан бол нийтийн баялгийг хулгайлж, бидний итгэлийг үгүй хийж, хөгжлийг маань боомилж буй тэр "үл үзэгдэх гар", тэр "хариуцлагагүй тогтолцоо", тэр авлига юм. 2025 онд авлига албан тушаалын гэмт хэрэгт 1369 холбогдогчийн 2259 үйлдэлтэй 1911 хэрэгт мөрдөн байцаах ажиллагаа явуулж 225 хэрэг шүүхээр шийдвэрлээд байна. Үүний хүрээнд 163.1 тэрбум төгрөгийн хохирлыг нөхөн төлүүлэв. Авлигатай хийх, шударга ёсны тэмцэл цаашид үргэлжилнэ" хэмээн онцолжээ.