Олон Улсын Парламентын холбооны Парламентчдын хүний эрхийн хорооны 179 дүгээр хурал Швейцарын Холбооны Улсын Женев хотноо болж байна.

Тус хурлаар УИХ-ын гишүүн О.Номинчимэг холбооны Хүний эрхийн хорооны Ерөнхийлөгчөөр сонгогдлоо. Энэхүү хороонд хүний эрхийн чиглэлээр мэдлэг, ур чадварыг нь харгалзан сонгодог бөгөөд 10 гишүүнтэйгээр үйл ажиллагаагаа явуулдаг.

Жил бүр дэлхийн олон оронд парламентчид доромжлол, ямар нэгэн дарамт шахалт, зүй бус харилцаанд өртөх, амиа алдах зэрэг аюулд өртдөг. Тиймээс тус хорооноос парламентчдыг хамгаалах чиглэлээр олон улсын парламентын хамтын нийгэмлэгийг дайчлан, үндэсний байгууллагуудтай хамтран ажиллаж, туслалцаа үзүүлдэг аж.

Өнөөдрийн байдлаар 886 хэрэг дээр ажиллаж байна гэж УИХ-ын Хэвлэл мэдээлэл, олон нийттэй харилцах газраас мэдээллээ.