Гадаад харилцааны дэд сайд Г.Амартүвшин энэ сарын 2-нд Бүгд Найрамдах Казахстан Улсаас Монгол Улсад суугаа Онц бөгөөд Бүрэн эрхт Элчин сайд А.Сейтакынов, Австралийн Холбооны Улсаас Монгол Улсад суугаа Онц бөгөөд Бүрэн эрхт Элчин сайд Лео Зенг нарыг тус тус хүлээн авч уулзаж, харилцаа, хамтын ажиллагааны өргөн хүрээний асуудлаар санал солилцлоо.

Дэд сайд Г.Амартүвшин Төв Ази дахь манай чухал түнш Бүгд Найрамдах Казахстан Улстай хөгжүүлж буй харилцаа, хамтын ажиллагаа хоёр улсын төрийн тэргүүн нарын хүчин чармайлт, дэмжлэгтэйгээр сүүлийн жилүүдэд идэвхтэй өргөжин тэлж буйг тэмдэглээд, Монгол, Казахстаны стратегийн түншлэлийн харилцааг цаашид улам бүр гүнзгийрүүлэн хөгжүүлэх хүрээнд энэ онд хэрэгжүүлэх айлчлалын талаар санал солилцов.

Элчин сайд А.Сейтакынов манай хоёр улс эрт дээр үеэс түүх соёл, өв уламжлалын гүн гүнзгий хэлхээ холбоотой гэдгийг онцлоод, Монгол, Казахстаны стратегийн түншлэлийн харилцааг улам бэхжүүлэх, дээд, өндөр түвшинд ярьж тохирсон ажлуудын хэрэгжилтийг хангах, харилцан ашигтай эдийн засгийн хамтын ажиллагааг өргөжүүлэн хөгжүүлэхэд Элчин сайдын хувиар хүчин чармайлт гаргаж, идэвхтэй хамтран ажиллахаа илэрхийлэв.

Номхон далайн бүс нутаг дахь манай чухал түнш Австрали Улстай хөгжүүлж буй харилцаа, хамтын ажиллагаа сүүлийн жилүүдэд өргөжин гүнзгийрч, эдүгээ “Иж бүрэн түншлэл”-ийн түвшинд хүрч, шат ахихад бэлэн болоод буйд сэтгэл хангалуун байгаагаа дэд сайд Г.Амартүвшин илэрхийлээд, өнгөрсөн хугацаанд хэрэгжүүлсэн дээд, өндөр түвшний харилцан айлчлалын мөрөөр ажиллаж, хамтын ажиллагааны эрх зүйн үндсийг үргэлжлүүлэн бэхжүүлэх нь чухал болохыг онцлов.

Элчин сайд Л.Зенг Монгол Улсад ажиллах хугацаандаа Монгол, Австралийн харилцааг бэхжүүлж, хамтын ажиллагааг уул уурхай, хөдөө аж ахуй, батлан хамгаалах, боловсрол, соёл зэрэг салбарт гүнзгийрүүлж, иргэд хоорондын хэлхээ холбоог эрчимжүүлэхэд онцгойлон анхаарч ажиллахаа илэрхийлэв гэж ГХЯ-наас мэдээллээ.