Хууль зүй, дотоод хэргийн дэд сайд Д.Мөнх-Эрдэнэ Япон Улсын Хууль зүйн яамны сургалт, судалгааны хүрээлэнгийн олон улсын хамтын ажиллагааны газрын захирал Хироюки Итог өчигдөр хүлээн авч уулзлаа.

ХЗДХЯ-ны мэдээлснээр, уулзалтын эхэнд дэд сайд Д.Мөнх-Эрдэнэ Ардчиллын нийтлэг үнэт зүйлст суурилсан Монгол, Японы “Энх тайван, хөгжил цэцэглэлтийн төлөөх тусгай стратегийн түншлэл” гүнзгийрч, хүн төвтэй хамтын ажиллагаа олон салбарт өргөжин хөгжиж буйд сэтгэл хангалуун байгаагаа илэрхийлэв. Тэрбээр Монгол Улсын Засгийн газрын 2024-2028 оны үйл ажиллагааны хөтөлбөрийн хүрээнд хувийн эрх зүйн хууль тогтоомжид хийж буй шинэчлэл, арилжааны анхдагч хуулийн төслийг боловсруулахад Япон Улсын Хууль зүйн яамны Сургалт, судалгааны хүрээлэнгээс оруулж буй хувь нэмэрт талархалтай байдгаа тэмдэглэв.

Мөн цаашид хууль эрх зүйн орчныг боловсронгуй болгох чиглэлээр үргэлжлүүлэн хамтран ажиллахаа илэрхийлээд сургалт, судалгааны хүрээлэнтэй хамтарсан сургалт, судалгааг өргөжүүлж, хүний нөөцийг чадавхжуулах чиглэлээр хамтын ажиллагаагаа үргэлжлүүлэх хүсэлтээ илэрхийлэв.

Япон Улсын Хууль зүйн яамны Сургалт, судалгааны хүрээлэн нь Манай улсын холбогдох байгууллагатай хууль тогтоомж боловсруулах, судалгаа хийх, сургалт, семинар зохион байгуулах чиглэлээр тогтвортой, үр дүнтэй хамтран ажиллаж байна.

2026 оны нэгдүгээр сард Токио хотноо арилжааны эрх зүйн орчны сэдэвт тав дахь удаагийн хамтарсан сургалт зохион байгуулж Япон-Монголын гэр бүл, хүүхдийн хэргийн шүүх, Японы иргэний хэрэг хянан шийдвэрлэх ажиллагааны шүүхийн шийдвэрийг баталгаажуулах сэдвээр Хууль зүйн үндэсний хүрээлэнд сургалт өнөөдөр зохион байгуулах аж.