Мах идэх нь урт наслахад эерэгээр нөлөөлдөг эсэх талаарх маргаанд Хятадын Шанхай хотын Шинжлэх ухааны судалгааны хүрээлэнгийн мэргэжилтнүүд цэг тавьсан судалгааны үр дүнгээ "The American Journal of Clinical Nutrition" сэтгүүлд нийтлүүлжээ.

Судалгааг 1998 оноос хойш 5000 гаруй өндөр настныг хамруулан явуулсан байна. Оролцогчдыг хоолны дэглэмээр нь махан хоолтон (нийт оролцогчдын 80%), цагаан хоолтон гэж ангилжээ. Цагаан хоолтнуудын дунд мах иддэггүй ч загас, өндөг, сүүн бүтээгдэхүүн хэрэглэдэг хүмүүс мөн багтсан бөгөөд хяналтын гол бүлэг нь холимог хоолтой хүмүүс байв. Эрдэмтэд дундаж наслалт нь 93.9 жил байсан 1459 өндөр настан болон 100 нас хүрэлгүй насан эцэслэсэн 3744 хүний үзүүлэлтийг харьцуулан дүгнэлт хийсэн байна.

Судалгааны үр дүнд махан хоолтон хүмүүс 100 наслах магадлал илүү өндөр байжээ. Тодруулбал, амьтны гаралтай хүнс хэрэглэдэггүй, зөвхөн ургамлын гаралтай хоол иддэг хүмүүсийн 24% нь 100 насалсан бол мах иддэг хүмүүсийн 30% нь 100 хүртэл насалсан байна. Харин мах иддэггүй ч загас, сүүн бүтээгдэхүүн хэрэглэдэг хүмүүсийн урт наслах магадлал холимог хоолтнуудтай ойролцоо байв.

Эрдэмтэд үүнийг амьтны гаралтай уураг нь ахимаг насанд булчингийн масс, ясны сийрэгжилтэд эерэг нөлөөтэй гэж тайлбарлажээ. Түүнчлэн хэт туранхай байх нь цагаан хоолны дэглэмтэй хавсрахад 100 наслах боломжийг эрс бууруулдаг болохыг анхааруулсан. Учир нь мах, загаснаас татгалзсанаар үүсэх шим тэжээлийн дутагдалд жин багатай хүмүүс илүү өртдөг байна.

"Хэдийгээр ургамлын гаралтай хоолны дэглэм нь архаг өвчний эрсдэлийг бууруулдаг ч хоол тэжээлийн дутагдал, ясны сийрэгжилтийн эрсдэлийг нэмэгдүүлдэг. Иймд ахимаг насныханд өндөр чанартай, тэнцвэртэй хооллолт чухал" хэмээн судлаачид дүгнэжээ.