Ардчилсан намын Ерөнхий нарийн бичгийн даргын үүрэг гүйцэтгэгч Д.Амарбаясгалан нар өнөөдөр /2026.01.29/ мэдээлэл хийлээ. Энэ үеэрээ Ерөнхий сайд Г.Занданшатар Шадар сайд Т.Доржханд, Эрчим хүчний сайд Б.Чойжилсүрэн нарт хариуцлага тооцохгүй бол Засгийн газрыг огцруулах акцийг улс орон даяар зохион байгуулах болно гэж мэдэгдлээ.

Д.Амарбаясгалан:

"Эрх баригчид 2016 оноос хойш гурван парламентад нийтдээ 170 гаруй их наяд төгрөгийн төсвийг захиран зарцуулсан байна. Сүүлийн гурван жилийн хугацаанд 70 гаруй их наяд төгрөгийг захиран зарцуулахаар баталсан. Гэвч эрх баригчид нэг ч цахилгаан станцыг ашиглалтад оруулаагүй.

Өвлийг ард түмний нуруун дээр үүрүүлж, цахилгааны хязгаарлалт, тасалдал хийж байгаа нь үнэхээр зохисгүй үйлдэл юм. Үүнээс гадна маш их төсөв хөрөнгийг захиран зарцуулж байгаа хэдий ч нийгэм, эдийн засагт бодит өөрчлөлт алга. Төрийг улам бүр данхайлгаж, 30 гаруй сайдтай данхар Засгийн газар бий болгож байгаад Ардчилсан намын бүлгийн гишүүд шүүмжлэлтэй хандсан. Дэд сайд нарыг томилсон асуудлаа эргэн харахгүй бол Засгийн газарт хариуцлага тооцох асуудлыг тавьсан. Үүнээс гадна цахилгааны хязгаарлалттай холбоотойгоор айл өрх, албан байгууллага, аж ахуйн нэгжүүдэд учирч байгаа хүндрэлүүдийн талаар УИХ дахь Ардчилсан намын бүлгийн гишүүн Ө.Шижир байр сууриа илэрхийлж, Шадар сайд Т.Доржханд, Эрчим хүчний сайд Б.Чойжилсүрэн нарт хариуцлага тооцож, огцруулах асуудлыг санаачлан гишүүдээр гарын үсэг зуруулж байгаа.

Засгийн газар яаралтай шийдвэр гаргаж, тухайн сайд нарыг эргүүлэн татах асуудлыг ойрын хугацаанд шийдэхгүй бол Ардчилсан намын зүгээс үндэсний хэмжээнд Засгийн газарт хариуцлага тооцох акцыг өрнүүлнэ.

Засгийн газар болон салбарын сайдад 100 хоногийн хугацаатай, мөн нэг сарын хугацаатай үүрэг өгсөн байсан. Гэтэл 2022 оноос хойш гурван Засгийн газар дамжин ажилласан Эрчим хүчний сайдаас 100 хоногийн хугацаанд ямар ч бодит үр дүн хүлээх боломжгүй. Агаарын бохирдол, утааны асуудлаа салхинд найддаг ийм сайд 100 хоногийн дотор энэ асуудлыг шийднэ гэдэг нь ард түмнийг хуурч, тайвшруулж байгаа арга юм.

Өнөөдрөөс тооцвол 100 хоногийн хугацаа нь тавдугаар сар хүртэл буюу орон сууцны дулааныг зогсоодог хугацаатай давхцаж байна. Энэ үед иргэдийн эрчим хүчний хэрэглээ буурсан байдаг. Өөрөөр хэлбэл цаг хожиж, асуудлаас бултах гэсэн арга. Засгийн газрын өнөөгийн байдал, ард түмэнд учруулж буй дарамт нь МАН-аас ард түмнээ чөлөөлөх нөхцөл байдалд хүргэж байна. Иймээс Засгийн газрын гишүүдэд яаралтай хариуцлага тооцохгүй бол ард түмнээс МАН-ыг чөлөөлөх улс төрийн акцыг эхлүүлж, Ардчилсан нам УИХ дахь Ардчилсан намын бүлэгтээ улс төрийн дэмжлэг үзүүлнэ” гэв.

Мөн “Нээлттэй, цэгцтэй Ардчилсан нам” үндэсний аяныг зохион байгуулахаар төлөвлөж байна. Тус аяны нээлтийг хоёрдугаар сарын 1-нээс эхлүүлнэ. Энэ хүрээнд гишүүдийнхээ шинэчилсэн бүртгэлийг бүх орон даяар цахимаар хийхээр тооцож байгаа. Энэхүү цахим бүртгэлийн аянд нийслэлийн 9 дүүрэг, 21 аймаг, 330 суманд байгаа 200 гаруй мянган гишүүд идэвхтэй хамрагдсанаар цаашид дотоод сонгуулиа зохион байгуулах саналын эрхтэй гишүүдийн суурь бүртгэл хийгдэнэ" гэв.