ДЦС-IV ТӨХК-ийн гүйцэтгэх захирал Н.Тавинбэхийг баасан гаригт АТГ-аас баривчлан саатуулсан явдал өнгөрөгч долоо хоногийн гол дуулиан боллоо.

Н.Тавинбэхийг өмнө нь Эрчим хүчний яамны Төрийн нарийн бичгийн даргаар ажиллаж байхдаа БНСУ-ын Эксим банкны эх үүсвэртэй хөнгөлөлттэй зээлээр Монгол Улсын 10 аймагт дулааны станц барих /нийт 148.7 сая ам.долларын зээлийн санхүүжилттэй/ төслийн зөвлөх үйлчилгээний 9 сая гаруй ам.долларын гэрээг байгуулсан. Ингэхдээ түүнийг албан тушаалын байдлаа урвуулан ашиглаж, зөвлөх үйлчилгээний төсвийг 2,6 сая ам.доллараар нэмж, нэр бүхий аж ахуйн нэгжид эдийн засгийн давуу байдал бий болгосон гэх хэрэгт холбогдуулан шалгаж байна.

Н.Тавинбэх нь 1989 онд Багануур дүүргийн 10 жилийн 64-р сургууль, 1995 онд ШУТИС-ийг цахилгааны инженер мэргэжлээр бакалавр, 2008 онд Удирдлагын Академийг Бизнесийн удирдлагын магистр зэрэгтэй төгсөж, 2003-2004 онд АНУ-д мэргэжил дээшлүүлсэн.

• 1995-1997 онд БНЦШСГ-т дэд станцын монтёр, мастер, инженер

• 1997-1998 онд БНЦШСГ-т Засварын албаны дарга

• 1999-2000 онд БЗӨБЦТС ТӨХК-ийн  Маркетингийн албаны менежер, дарга

• 2001-2007 онд БЗӨБЦТС ТӨХК-ийн  Техник технологи эрхэлсэн дэд захирал, ерөнхий инженер

• 2007-2013 онд БЗӨБЦТС ТӨХК-ийн  Гүйцэтгэх захирал

• 2013-2015 онд Багануур Энерги ХХК-ийн Захирал

• 2015-2016 онд Багануур хотын Захирагч

• 2017-2020 онд БЗӨБЦТС ТӨХК-ийн  Гүйцэтгэх захирлаа ажиллаж байгаад Эрчим хүчний сайдаар томилогджээ.

Мөн Эрчим хүчний сайдын зөвлөх асан П.Товуудорж, Эрчим хүчний яамны газрын дарга асан Б.Насантогтох нарыг АТГ-аас саатуулан шалгаж байна. 

Б.Насантогтох нь Эрчим хүчний яамны Бодлогын хэрэгжилтийг зохицуулах газрын даргаар ажиллаж байхдаа 2023 оны арваннэгдүгээр сарын 16-ны өдөр нэр бүхий аж ахуйн нэгжээс ирүүлсэн Баянхонгор аймгийн Шинэжинст сумын нутагт баригдах уул уурхайн баяжуулах үйлдвэрийн цахилгаан хангамжийн техникийн нөхцөл олгуулах хүсэлтийг хэлэлцэж, тухайн өдрөө цахилгаан хангамжийн техникийн нөхцөлийг баталжээ. Дээрх техникийн нөхцөл баталснаас хойш буюу 2024 оны зургадугаар сарын 20-ны өдөр Б.Насантогтох өөрийн эхнэрийн үүсгэн байгуулсан нэр бүхий аж ахуйн нэгжийн нэрээр дээр дурдсан аж ахуйн нэгжтэй ган голтой хөнгөн цагаан дамжуулагч утас нийлүүлэх 5,5 тэрбум төгрөгийн өртөгтэй гэрээг байгуулж, өөртөө давуу байдал бий болгосон байна. Түүний гэрт хийсэн нэгжлэгээр 10.600 ам.доллар, 11.600 юань, 300 мянган вонн, 3440 евро, хамаарал бүхий этгээдийнх нь гэрээс 70 мянган ам.доллар буюу нийт 350 орчим сая төгрөгийг хураан авчээ. Уг мөнгөний эх үүсвэрийг тогтоохоор мөрдөн шалгах ажиллагаа явуулж байна.