Энэ өдрүүдэд цагдаа, дотоодын цэргийн байгууллагын удирдах ажилтнууд “Дижитал шийдэл-Аюулгүй нийгэм” уриан дор нэгдсэн зөвлөгөөнөө хийж байна.

Монгол Улсын Ерөнхийлөгч, Зэвсэгт хүчний Ерөнхий командлагч Ухнаагийн Хүрэлсүх зөвлөгөөнд оролцон, төр, ард түмнээ хамгаалах, шударга ёс тогтоох, хүний эрх, эрх чөлөөг хангах үүргээ нэр төртэй биелүүлж ирсэн алба хаагчдын ажил үйлсийг төр, засаг, ард түмэн өндөр үнэлж байдгийг тэмдэглэлээ.

Хууль, эрх зүйн орчинг улам боловсронгуй болгох, алба хаагчдын цалин хөлс, орон сууц, эрүүл мэнд, нийгмийн баталгаа зэргийг сайжруулахтай холбоотой санал, санаачилгыг урьдын адил дэмжиж ажиллахаа илэрхийлэв.

Цаашид цагдаа, дотоодын цэргийн байгууллага их өгөгдөл, хиймэл оюун, дэвшилтэт технологид суурилсан, шинжлэх ухаанч шийдвэр гаргах чадамжтай, урьдчилан сэргийлэх чадвартай байхын төлөө бүх нөөц бололцоогоо дайчлан ажиллахыг чиглэл болголоо.

Хүний эрхийн мэдрэмжтэй, ёс зүйтэй, шударга, зөв үлгэр дуурайлтай, манлайлагч байх, алба хаагчдыг тогтвортой, ирээдүйдээ итгэлтэй ажиллах боломж, нөхцөл бүрдүүлэх нь чухал гэж үздэгээ илэрхийлэв.

Нийт бие бүрэлдэхүүний мэргэжлийн ур чадварыг нэмэгдүүлэх, сургалт бэлтгэл, техник, тусгай хэрэгслийг олон улсын жишигт хүргэх, төрийн цэргийн болон хууль сахиулах байгууллагууд хамтын ажиллагаагаа байнга дээшлүүлж байхыг захилаа.

Энэ онд Улаанбаатар хотноо зохион байгуулах цөлжилттэй тэмцэх тухай НҮБ-ын суурь конвенцийн оролцогч талуудын 17 дугаар Бага хурлын үеийн аюулгүй байдал, хамгаалалт, зохицуулалтыг өндөр түвшинд зохион байгуулахыг үүрэг болголоо.

Улс төр, бизнесийн явцуу ашиг сонирхолд үйлчлэх, аливаа дарамт шахалт, эрх мэдэлтний хүсэл, даалгавраар гэмгүй нэгнийг хэлмэгдүүлэх, гэмт этгээдийг ял завшуулахын эсрэг тууштай зогсохыг санууллаа.

Энэ бүхэнд удирдах бүрэлдэхүүний манлайлал, оролцоо нэн чухал гэдгийг онцгойлон анхаарууллаа.

Цагдаа, дотоодын цэргийн байгууллага энэ жил хүний эрхийг хангах, ажилдаа иргэдийн оролцоог хангах, шинжлэх ухаан, технологийн ололтыг нэвтрүүлэх, албадын мэргэшсэн байдлыг сайжруулах, алба хаагчдын мэргэжлийн ур чадварын өсөлтийг дэмжсэн хүний нөөцийн бодлого хэрэгжүүлэх зэрэг зорилт тавьжээ.