“Монгол Улсын Үндсэн хуулийн өдөр”-т зориулан УИХ-аас уламжлал болгон зохион байгуулдаг Шатар сонирхогчдын улсын аварга шалгаруулах тэмцээний шувтаргын тоглолт Төрийн ордонд өнөөдөр эхэллээ.

УИХ дахь МАН-ын бүлгийн дарга Ж.Батжаргал тэмцээнийг нээж үг хэлэв. Тэрбээр, ирсэн зочдод Үндсэн хуулийн өдрийн мэндийг дэвшүүлээд, оюун ухааны спортын хаан болсон шатрын спортоор монголчууд найман настайгаас 80 хүртэл нас ялгалгүй тоглодгийг онцлов. Тэрбээр, энэ удаагийн тэмцээнд 87 насыг зооглож буй Д.Найдан гуай хүрэлцэн ирснийг танилцуулаад, энэ хүн Үндсэн хууль тогтоогчдын нэг Ардын Их Хурлын депатут гэдгийг тодотголоо. Өнгөрсөн жилүүдэд манай улсын тамирчид олон амжилт гаргаж, дэлхий нийтэд эх орныхоо нэрийг цуурайтуулсныг онцлон дурдаж, оролцогчдод амжилт хүсэв.

Үүний дараа Ерөнхий сайд, Шатрын холбооны ерөнхийлөгч Г.Занданшатар мэндчилгээ дэвшүүллээ. Ардчилал, шударга ёс, хүний эрх, эрх чөлөөг тунхаглан зарлаж, нийгмийн шинэчлэл, хөгжил дэвшлийн тулгуур болсон Үндсэн хуулийн өдрийн мэндийг өргөн дэвшүүлж, Үндсэн хуульт ёсоо дээдлэн сахих бахархах түүхт энэ өдөр шатар сонирхогчдын УАШТ-ийг УИХ-ын даргын ивээл дор уламжлал болгон 14 дэх жилдээ зохион байгуулж байгааг онцлов. 2012 онд Шатрын холбооноос санаачилга гаргаж, анх удаа тус онд тэмцээнийг зохион байгуулж эхэлснийг дурдаад, энэхүү тэмцээнийг зохион байгуулахад УИХ-ын дарга Н.Учрал гүн туслалцаа үзүүлж хамтран ажиллаж байгаад Монголын шатрын холбооны нэрийн өмнөөс болон нийт шатарчдынхаа нэрийн өмнөөс гүн талархал илэрхийллээ.

Мөн Дэлхийн шатрын холбооноос 2026 оныг шатрын боловсролын жил болгон тодорхойлж байгаа гэв. Түүнчлэн олон нийтэд шатрын ач холбогдлыг ухуулан таниулах, шатрын спортоор хичээллэгчдийн хүрээг тэлэх, тамирчдынхаа амжилтыг ахиулахын төлөө дэлхий даяар анхаарч ажиллаж байна гэлээ. 

Тэмцээний эхэнд УИХ дахь МАН-ын бүлгийн дарга Ж.Батжаргал УИХ-ын гишүүн О.Амгаланбаатар нар хүндэтгэлийн өрөг нүүлээ. Уг тэмцээн сум, дүүргийн хүрээнд анхан шат, аймаг, нийслэлийн хэмжээнд хагас шигшээ, улсын хэмжээнд шигшээ гэсэн 3 үе шаттай болдог. Анхан шатны тэмцээн өнгөрөгч оны арванхоёрдугаар сарын 6, 7-ны өдрүүдэд 331 сум нийслэлийн 9 дүүрэгт амжилттай болж, 4922 шатарчин хамрагдсан. Энэ нь өмнөх оныхтой харьцуулахад оролцогчдын тоо дөрвөн хувиар өссөн үзүүлэлт юм.

Хагас шигшээ тэмцээн мөн өнгөрсөн сарын 20, 21-нд бүх аймаг болон нийслэлд нэгэн зэрэг болж, 696 шатарчин оролцсон нь өмнөх оныхоос 9 хувиар өссөн байна. Анхан шатын тэмцээнд 409 оролцогчоор Баянхонгор, 319 оролцогчоор Говь-Алтай, 309 оролцогчоор Завхан шалгарч, хамгийн олон шатарчин оролцсон аймгаар тодров.