АНУ өргөн хэмжээний цохилт өгсний дараа Венесуэлийн захирагч Николас Мадурог баривчилсан гэж АНУ-ын Ерөнхийлөгч Дональд Трамп өчигдөр мэдэгджээ.
“Венесуэл ба түүний удирдагч, ерөнхийлөгч Николас Мадурогийн эсрэг өргөн хэмжээний цохилтын ажиллагааг АНУ амжилттай явуулсны дараа Мадуро болон түүний эхнэрийг баривчлан тус улсаас агаарын замаар гаргалаа” гэж Д.Трамп Truth Social нийгмийн сүлжээний хуудсандаа бичсэн байна.
АНУ-ын армийн тусгай хүчний “Дельта” элит ангийнхан Н.Мадурог баривчилсан тухай CBS News мэдээлжээ. Тус анги 2019 онд “Лалын улс” бүлэглэлийн толгойлогч Абу Бакр аль-Багдадиг устгах ажиллагааг явуулсан байна.
Нью-Йорк муж улсын Өмнөд тойргийн шүүхээс Н.Мадуро, түүний эхнэр Силия Флорес нарыг хуулийн хэд хэдэн заалтаар, тухайлбал, кокаин оруулж ирэх зорилгоор хуйвалдаан зохион байгуулсан, АНУ-ын эсрэг хэрэглэхийн тулд зэвсэг хадгалсан гэх зүйл ангиудаар буруутгаж байгаа тухай АНУ-ын Ерөнхий прокурор Пэм Бонди Х нийгмийн сүлжээнд мэдээлжээ.
Н.Мадурог баривчилснаар Венесуэлд явуулж буй АНУ-ын цэргийн ажиллагаа дууслаа гэж Юта муж улсаас сонгогдсон Сенатын гишүүн Майк Ли АНУ-ын Төрийн нарийн бичгийн дарга Марко Рубиогийн ярьснаас эш татан мэдээллээ.
