Монгол Улсын Шадар сайд Х.Ганхуягаар ахлуулсан ажлын хэсэг Сэлэнгэ аймгийн Алтанбулаг чөлөөт бүсэд ажиллажээ.
2025 оны эхний хагас жилийн байдлаар ОХУ-аас 136.9 мянган тонн ачаа импортолсон байна. Үүний 110.7 мянган тонныг нь Алтанбулаг боомтоор нэвтэрсэн бөгөөд өнгөрсөн оны мөн үеийнхтэй харьцуулахад 2.5 дахин өссөн үзүүлэлттэй аж. Мөн энэ хугацаанд тус боомтоор 30 мянга гаруй гадаад зорчигч нэвтэрсний 10 хувь нь чөлөөт бүсээр зочилжээ.
Шадар сайд Х.Ганхуяг ярихдаа “Чөлөөт бүс нь зөвхөн татваргүй бараа худалдаалах бус Монгол Улсын бүтээгдэхүүнийг Алтанбулаг боомтоор дамжуулан ОХУ болон Евразируу экспортлох боломжийг бодитоор бүрдүүлэхэд анхаарч ажиллах шаардлагатай. Хөрөнгө оруулагчидтай уулзалт зохион байгуулж, тэдний шаардлагад нийцсэн газар олголт, дэд бүтцийн шийдлийг боловсруулах, аймгийн удирдлагуудтай нягт хамтран цаашдын хөгжлийн бодлогоо тодорхойлох хэрэгтэй байна. Мөн хууль, эрх зүйн орчныг сайжруулах чиглэлээр ажлын хэсэг байгуулан холбогдох саналуудыг нэгтгэн боловсруулах шаардлагатай” гэв.
Ажлын хэсгийн хүрээнд Шадар сайд Х.Ганхуяг Алтанбулаг автозамын боомтын нэгдсэн лабораторид мөн ажилласан байна. Энэ үеэр Монгол Улсын хил гаалиар нэвтрүүлж буй бараа, материалд заавал шалгах ёстой 468 үзүүлэлтийг 100 хувь бүрэн тодорхойлох чадавхыг бүрдүүлж ажиллах, хилээр нэвтэрч байгаа бараа бүтээгдэхүүний асуудлыг үндэсний аюулгүй байдал, хил, хорио цээрийн тогтолцоотой уялдуулан цогцоор нь шинэчлэхэд анхаарахыг захилаа.
