Гадаад харилцааны яамны Төрийн нарийн бичгийн дарга Л.Мөнхтүшиг тэргүүтэй төлөөлөгчид Катар Улсын Доха хотноо энэ сарын 15-19-нд болж буй Авлигын эсрэг НҮБ-ын конвенцын Оролцогч талуудын 11 дүгээр бага хуралд оролцож байна.

Авлигын эсрэг НҮБ-ын конвенцыг НҮБ-ын Ерөнхий Ассамблейн 2003 оны аравдугаар сарын 31-ний өдрийн 58/4 тоот тогтоолоор баталж, УИХ 2005 оны аравдугаар сарын 27-нд соёрхон баталсан. Тус бага хурлаар Монгол Улс конвенцоор хүлээсэн үүргийн хэрэгжилтийг хангах хүрээнд авч хэрэгжүүлж буй дотоодын арга хэмжээ, ялангуяа хууль эрх зүйн орчны шинэчлэл, Засгийн газрын бодлого, үйл ажиллагаа, мөн авлигатай тэмцэх чиглэлээрх олон улс, бүс нутгийн хамтын ажиллагааны талаар байр сууриа танилцуулж, санал солилцож байна.

Бага хурлын хүрээнд Төрийн нарийн бичгийн дарга Л.Мөнхтүшиг энэ сарын 16-нд улсаа төлөөлөн үг хэлж, Монгол Улсын Засгийн газар авлигатай тэмцэх ажлыг тэргүүлэх чиглэл болгон хэрэгжүүлж байгааг онцлов. Тэрбээр авлига нь төрд итгэх иргэдийн итгэл, ардчилсан засаглал, эдийн засгийн шударга өрсөлдөөнд бодитой аюул учруулдаг гэдгийг онцлон, Авлигатай тэмцэх үндэсний хөтөлбөрийн хэрэгжилтийг эрчимжүүлэх чиглэлээр сүүлийн үед Монгол Улсад хэрэгжүүлж буй арга хэмжээнүүдийн тухай мэдээлж, Монгол Улсын Засгийн газраас 2026 оныг “Төрийн албанд сахилга, хариуцлагыг бэхжүүлэх жил” болгон зарлаж буйг онцлон дурдав.

Мөн Монгол Улс Албани, Гана, Норвеги зэрэг улстай хамтран “Сонгуульд нэр дэвшигчид, улс төрийн намууд болон сонгуулийн кампанит ажлын санхүүжилтийн ил тод байдлыг нэмэгдүүлэх тухай” тогтоолын төслийг санаачлан өргөн барьсан бөгөөд уг тогтоолыг баталснаар Авлигын эсрэг НҮБ-ын конвенцын хүрээнд улс төрийн санхүүжилтийн ил тод байдлыг хөндсөн анхны тогтоол болох ач холбогдолтойг онцлон гишүүн орнуудыг дэмжихийг уриаллаа.

Авлигын эсрэг НҮБ-ын конвенцын Оролцогч талуудын Бага хурал нь хоёр жил тутам зохион болдог бөгөөд дэлхийн 192 улс тус конвенцын гишүүн юм гэж ГХЯ-наас мэдээллээ.