УИХ-ын Хүний хөгжил, нийгмийн бодлогын байнгын хороо, Соёл, спорт, залуучуудын дэд хороо, ССАЖЗЯ хамтран “Спортоор тогтмол хичээллэе” уриан дор биеийн тамир, спортын салбарын төлөөлөлтэй уулзалт, хэлэлцүүлэг зохион байгууллаа.

Уулзалт, хэлэлцүүлгийг нээж УИУ-ын гишүүн, Хүний хөгжил, нийгмийн бодлогын байнгын хорооны дарга Б.Найдалаа үг хэлэхдээ, “Биеийн тамир, спортын салбар нь хүн амын эрүүл амьдралын хэв маягийг төлөвшүүлэх, залуу үеийг эх оронч үзэл, сахилга бат, тэсвэр хатуужлаар хүмүүжүүлэхэд чухал үүрэгтэй. Монгол Улсад хөдөлгөөний хомсдол, илүүдэл жин, таргалалт нэмэгдэж буй судалгааны үзүүлэлтүүдийг дурдан, иргэд, ялангуяа хүүхэд, залуучуудын дунд идэвхтэй хөдөлгөөн, спортоор тогтмол хичээллэх соёл, дадлыг хэвшүүлэх шаардлагатай байна” гэв.

Хэлэлцүүлэгт УИХ-ын гишүүд, холбогдох яам, агентлагийн удирдлага, мэргэжилтнүүд, спортын холбоод, клубүүд, дасгалжуулагчид, тамирчдын төлөөлөл, эрдэмтэн, судлаачид оролцож, дараах асуудлуудын хүрээнд санал солилцлоо. Тухайлбал, биеийн тамир, спортын салбарын хууль эрх зүйн орчны хэрэгжилт, тулгамдсан асуудал, иргэдийн хөдөлгөөний идэвх, эрүүл мэндийг дэмжих бодлого, хөтөлбөрийн уялдаа, спортын дэд бүтэц, санхүүжилт, хүний нөөцийн хөгжил, хүүхэд, залуучууд, өндөр настан, хөгжлийн бэрхшээлтэй иргэдийн спортын оролцоог нэмэгдүүлэх боломж, мэргэжлийн болон нийтийн биеийн тамир, спортын тогтолцоог боловсронгуй болгох шийдлүүдийг ярилцжээ.

Энэхүү хэлэлцүүлгийн зорилго нь биеийн тамир, спортын салбарын өнөөгийн нөхцөл байдал, тулгамдаж буй асуудал, цаашдын бодлого, хууль эрх зүйн орчныг сайжруулах санал, шийдлийг салбарын оролцогч талуудын байр сууринд тулгуурлан тодорхойлоход оршиж байгаа юм. Оролцогчид салбарын бодлого, төлөвлөлтийг шинжлэх ухаанд суурилсан, урт хугацааны зорилготойгоор хэрэгжүүлэх, төр-хувийн хэвшил, иргэний нийгмийн хамтын ажиллагааг бэхжүүлэх шаардлагатайг онцоллоо. Уулзалт, хэлэлцүүлгээс гарсан санал, зөвлөмжийг нэгтгэн УИХ-ын холбогдох байнгын болон дэд хороодоор хэлэлцүүлж, цаашдын бодлогын шийдвэр гаргалтад ашиглана.