Бүгд Найрамдах Улсаа тунхаглан анхдугаар Үндсэн хуулиа баталсны 101 жилийн ой, Монгол Улс, Кувейт Улс дипломат харилцаа тогтоосны 50 жилийн ойн хүлээн авалт  Эль-Кувейт хотноо энэ сарын 7-нд боллоо.

Кувейт Улсад суугаа ЭСЯ-ны мэдээлснээр, Элчин сайд П.Сэргэлэн энэ үеэр Монгол Улсаас Кувейт Улс руу ойрын хугацаанд үхрийн мах, малын экспорт эхлүүлж буйг хэллээ. Мөн Засгийн газар хооронд “Агаарын харилцааны тухай хэлэлцээр” байгуулж, шууд нислэгийн судалгааг эхлүүлээд байгаа зэрэг нь хоёр улсын харилцаа, хамтын ажиллагаа үр дүнтэй байгаагийн бодит жишээ гэдгийг онцоллоо. Түүнчлэн цаашид уул уурхай, газрын тос, сэргээгдэх эрчим хүч, эрчим хүчний дэд бүтэц, соёл, боловсрол, мэдээллийн технологи зэрэг салбарт урт хугацааны харилцаа, хамтын ажиллагааны өргөн боломж байгааг тэмдэглэв.

Монгол Улсаас Кувейт Улс руу сайн чанарын үхрийн мах нийлүүлэх ажлын хүрээнд манай улсын “Delta Holding” компанийн төлөөлөл хүрэлцэн очсон байсан тул компанийнхаа үйл ажиллагаа, сайн чанарын үхрийн махны экспортын талаар танилцууллаа.

Мөн үеэр ҮУИТ-ын уран бүтээлчид урын сангийнхаа дээжээс толилуулсан нь өв соёл, үндэсний урлагаа олон улсад таниулсан явдал болов. Түүнчлэн энэ үеэр Соёлын тэргүүний ажилтан, дуучин С.Аяанаа дэлхийн сонгодог уран бүтээлээс толилуулсан бол загвар зохион бүтээгч Б.Маралмаагийн үндэсний хувцас болон гоёлын даашинзны загварын шоу боллоо. Үүний зэрэгцээ монгол махны чанар, амтыг таниулсан үндэсний хоолны амталгаа болсны зэрэгцээ Монгол орны байгаль, аялал жуулчлал, түүхэн дурсгалт газруудыг харуулсан уран зургийн үзэсгэлэнг дэлгэв.

Хүлээн авалтад тус улсын төр, засгийн өндөр албан тушаалтнууд, дипломат төлөөлөгчийн газар, олон улсын байгууллагын тэргүүн нар, бизнес эрхлэгч, сэтгүүлч сурвалжлагч зэрэг нийт 500 гаруй зочин хүрэлцэн ирэв. Монгол Улс, Кувейт Улс 1975 оны зургаадугаар сарын 17-нд дипломат харилцаа тогтоож байсан түүхтэй.