УИХ-ын Аюулгүй байдал, гадаад бодлогын байнгын хороо, ҮАБЗ-ийн Стратегийн судалгааны хүрээлэнтэй хамтран энэ сарын 5-нд "Евразийн аюулгүй байдал ба Монгол Улс” сэдэвт хэлэлцүүлгийг зохион байгуулна.
Энэ талаар МУИС-ийн Ази судлалын тэнхимийн профессор, доктор С.Баттулга, Хүмүүнлэгийн ухааны их сургуулийн Олон улсын харилцаа, нийгэм судлалын сургуулийн доктор, профессор Д.Уламбаяр нар энэ сарын 12-нд Төрийн ордонд хийсэн хэвлэлийн бага хурлын үеэр мэдээлэв.
Хүмүүнлэгийн ухааны их сургуулийн Олон улсын харилцаа, нийгэм судлалын сургуулийн доктор, профессор Д.Уламбаяр, “УИХ-ын Аюулгүй байдал, гадаад бодлогын байнгын хороо, Хүмүүнлэгийн ухааны их сургуулийн Олон улсын харилцаа, нийгэм судлалын сургуультай хамтран Үндэсний аюулгүй байдлын зөвлөлийн Стратегийн судалгааны хүрээлэн, МУИС-ийн Улс төр судлал, олон улсын харилцаа, нийтийн удирдлагын сургууль, Монголын МГИМО төгсөгчдийн холбооны дэмжлэгтэйгээр “Хурдацтай өөрчлөгдөн буй дэлхий ертөнц дэх Монгол Улсын гадаад бодлого” сэдэвт эрдэм шинжилгээний бага хурлыг энэ оны нэгдүгээр сарын 29-нд хийсэн.
Тус хурлын үргэлжлэл болгож “Хурдацтай өөрчлөгдөн буй дэлхий ертөнц дэх Монгол Улсын гадаад бодлого” хэлэлцүүлгийг энэ сарын 5-нд зохион байгуулах гэж байна.
Манай улс Гадаад бодлогын үзэл баримтлалдаа энхийг эрхэмлэсэн, олон тулгуурт, бие даасан, нээлттэй, гадаад бодлогыг хэрэгжүүлнэ хэмээн заасан. Өнөө цагт олон улсын дэг журам, геополитикийн уламжлалт чиг хандлага, хүчний тэнцвэрт харьцаа өөрчлөгдөж, хүчний шинэ шилжилт хөдөлгөөн эрчимжиж, улс гүрнүүдийн сонирхлын зөрчил идэвхжиж байгаа энэ үед эрдэмтэн судлаачдын байр суурийг сонсож, нэгтгэх нь ихээхэн чухал юм” хэмээн ярилаа.
МУИС-ийн Ази судлалын тэнхимийн профессор, доктор С.Баттулга өмнөх хэлэлцүүлгийн үеэр хэлэлцсэн илтгэлүүдийг эмхэтгэн, монгол, англи, орос хэлээр ном болгон хэвлүүлсэн гэдгийг хэллээ. "Евразийн аюулгүй байдал ба Монгол Улс” сэдэвт хэлэлцүүлгийн үеэр оролцогчид 10 илтгэл тавих аж.
