Гадаад харилцааны сайд Б.Батцэцэг Бүгд Найрамдах Итали Улсын Шадар сайд бөгөөд Гадаад хэрэг, олон улсын хамтын ажиллагааны сайд Антонио Таяанитай энэ сарын 2-нд Ром хотноо хоёр талын уулзалт хийлээ.

Уулзалтын үеэр Монгол Улсын Ерөнхийлөгч У.Хүрэлсүхийн Бүгд Найрамдах Итали Улсад хэрэгжүүлж буй төрийн айлчлалын хүрээнд хоёр улсын харилцааны түвшнийг ахиулж, “Стратегийн түншлэлийн тухай Монгол Улс, Бүгд Найрамдах Итали Улс хоорондын хамтарсан Тунхаглал баталж байгаагаа мэдэгдэж, хоёр орны харилцааны түүхэн шинэ хуудас нээж байгааг онцоллоо. Түүнчлэн хоёр улсын хооронд дипломат харилцаа тогтоосны 55 жилийн ойг тохиолдуулан хэрэгжүүлж буй төрийн айлчлалын хүрээнд боловсрол, шинжлэх ухаан соёл, спорт, аялал жуулчлал, хэвлэл мэдээлэл, орон нутгийн хөгжил зэрэг чиглэлээр хамтын ажиллагааны 10 гаруй баримт бичиг байгуулж буй нь хоёр орны харилцаа, хамтын ажиллагааг өргөжүүлэхэд чухал хувь нэмэр оруулна гэдэгт санал нэгдлээ.

Төрийн айлчлалын хүрээнд Тунхагласан Стратегийн түншлэлийн хүрээнд Монгол, Италийн харилцаа, хамтын ажиллагааг эдийн засгийн үр өгөөжөөр баяжуулж, худалдаа, хөрөнгө оруулалтыг эрчимтэй нэмэгдүүлэх, тухайлбал, хувцас загвар, ноолуурын салбарт тогтвортой нийлүүлэлтийн сүлжээг бий болгох, хөдөө аж ахуйн үйлдвэрлэл, сэргээгдэх эрчим хүч болон эрчим хүчний шилжилтийг дэмжсэн технологи зэрэг тэргүүлэх салбарт жижиг, дунд үйлдвэрлэлийн хамтын ажиллагаа болон аж үйлдвэрийн хамтын ажиллагааг дэмжиж ажиллахаа нотоллоо. Чингэснээр экспортыг нэмэгдүүлэх шинэ гарцыг нээх, хөрөнгө оруулалт, эдийн засгийн хамтын ажиллагааны нөөц бололцоог ашиглах зэргээр хоёр орны хөгжил цэцэглэлтэд хувь нэмэр оруулна гэдэгт итгэж байгаагаа илэрхийллээ.

Сайд нар НҮБ болон олон улсын бусад байгууллагын хүрээнд хоёр улсын хамтын ажиллагааг бэхжүүлэхээ нотолж, бүс нутгийн болон олон улсын харилцааны зарим асуудлаар дэлгэрэнгүй санал солилцлоо гэж ГХЯ-наас мэдээллээ.