Дархан-Уул аймагт Бүгд Найрамдах улсаа тунхаглаж, анхдугаар Үндсэн хуулиа баталсны түүхэн 101 жилийн ойг тэмдэглэн өнгөрүүлэх арга хэмжээний хүрээнд төрийн жинхэнэ албан хаагчийн тангараг өргүүлэх ёслолын ажиллагааг зохион байгууллаа. Төрийн захиргааны таван байгууллагын долоон албан хаагч төрийн сүлдэндээ мэхийн ёслож, эх орон, ард түмнийхээ төлөө сэтгэл, эрдэм чадлаа зориулах тангараг өргөн, Монгол Улсын Үндсэн хууль болон ёс зүйн журмыг чанд дээдлэн, үндэсний язгуур ашиг сонирхолд хөтлөгдөн үүргээ нэр төртэй биелүүлэхээ илэрхийллээ.
Тангараг өргөсөн албан хаагчид Боловсролын газар, аймгийн Засаг даргын Тамгын газар, Шарын гол сумын Иргэдийн Төлөөлөгчдийн Хурлын ажлын албанд ажиллаж буй бөгөөд улс тунхагласны энэ өдөр төрийн жинхэнэ албан хаагчийн статусыг албан ёсоор хүлээн авч буй нь тэдний ажил үйлст шинэ хуудас нээсэн үйл явдал боллоо.
Ёслолын ажиллагааг Төрийн захиргаа, удирдлагын хэлтэс зохион байгуулж, аймгийн ЗДТГ-ын дарга О.Хүрэлчулуун, Нийгмийн бодлогын хэлтсийн дарга Н.Цасчихэр, Боловсролын газрын дарга Л.Буянтогтох болон Шарын гол сумын ИТХ-ын дарга нар шинэ албан хаагчдад баяр хүргэн, цаашдын ажилд нь амжилт хүсэв.
