Японы нийслэл Токио хотод Монгол, Японы төр хувийн хэвшлийн хамтын ажиллагааны XII зөвлөлдөх уулзалт өнөөдөр үргэлжилж байна. Уулзалтад Монголын талаас Шадар сайд Х.Ганхуяг, Японы талаас Эдийн засаг, худалдаа, аж үйлдвэрийн дэд сайд К.Ямада нар ахалж, хоёр улсын гадаад бодлого, эдийн засгийн салбарын байгууллагууд болон хувийн хэвшлийн төлөөллөөс бүрдсэн нийт 170 орчим хүн оролцов.

Шадар сайд Х.Ганхуяг нээлтийн үгэндээ 2025 он Монгол, Японы харилцаанд түүхэн онцлогтой жил болсныг онцлон дурдлаа. Япон Улсын Цог Жавхлант Эзэн Хаан, Эрхэм дээд Хатан нар Монгол Улсад анх удаа төрийн айлчлал хийснээр хоёр улсын найрсаг харилцааны суурь илүү батажсан хэмээн тэрбээр тэмдэглэв. Тэрээр эдийн засгийн хамтын ажиллагааг өргөжүүлэх, худалдаа, хөрөнгө оруулалтын урсгалыг нэмэгдүүлэх, хувийн хэвшлийн уялдаа холбоог шинэ түвшинд гаргахын тулд энэхүү зөвлөлдөх уулзалт чухал ач холбогдолтой болохыг онцлон хэлэв.

Уулзалтын үеэр санхүүгийн орчны сайжруулалт, ногоон санхүүжилтийн шийдэл, чухал ашигт малтмалын нөөц ба хамтын ажиллагааны боломж, сэргээгдэх эрчим хүчний хөрөнгө оруулалт, уур амьсгалын өөрчлөлттэй тэмцэх бодлого, шинжлэх ухаан технологи болон инновацын салбарын түншлэл зэрэг өргөн хүрээний асуудлаар талууд нээлттэй санал солилцов. Монголын тал хөгжлийн бодлого, томоохон бүтээн байгуулалтын төсөл, хөтөлбөрүүдийн талаар танилцуулж, Япон Улсаас шинэ хөрөнгө оруулалт татах, дэвшилтэт технологи нутагшуулах чиглэлд хамтын ажиллагаагаа өргөжүүлэх хүсэлтэй байгаагаа илэрхийлэв.

Монгол, Японы төр хувийн хэвшлийн зөвлөлдөх уулзалт 2007 оноос хойш Улаанбаатар, Токио хотноо ээлжлэн зохион байгуулагдсаар ирсэн бөгөөд дараагийн буюу XIII уулзалтыг 2026 онд Монгол Улсад хийхээр товлоод байна.

Эх сурвалж: Kyodonews / Mainichi / NHK