Монгол Улс Бүгд найрамдах улсаа тунхаглаж, анхдугаар Үндсэн хуулиа баталсны түүхэн ойн өдөртэй давхцуулан Монгол Улсаас Австралийн Холбооны Улсад суугаа Элчин сайдын яам Канберра хотноо хүндэтгэлийн хүлээн авалт зохион байгууллаа. Энэхүү арга хэмжээ нь түүхэн үйл явдлын утга учрыг олон улсад сурталчлахын зэрэгцээ хоёр орны найрсаг харилцааг бэхжүүлэх зорилготой байв.

Нээлтийн үеэр Элчин сайд Д.Даваасүрэн Бүгд найрамдах улсаа тунхаглаж, анхдугаар Үндсэн хуулиа баталсан нь Монголын орчин үеийн төр улсыг төлөвшүүлсэн чухал алхам гэдгийг онцлон тэмдэглэж, энэхүү ойн өдөр дэлхийн олон улс оронд суугаа монголчуудын хувьд бахархалтын мөч болохыг дурдав. Хүлээн авалтын үеэр язгуур урлагийн тоглолт толилуулж, Монгол орны соёл уламжлалыг харуулсан видео контент үзүүлж, үндэсний зоогоор зочдыг дайлан соёлын нийтлэг ойлголцол, харилцааг бэхжүүлэх уур амьсгалыг бүрдүүлэв.

Арга хэмжээнд Австралийн парламентын гишүүд, Гадаад хэрэг, худалдааны яам болон төр, засгийн байгууллагын төлөөлөл, тус улсад суугаа гадаад улсын дипломат төлөөлөгчийн газрын тэргүүнүүд, Австралийн олон улсын Эмэгтэйчүүдийн холбооны удирдлага, Канберра, Сидней, Мелбурн, Брисбэн хотын монголчуудын нийгэмлэгүүдийн төлөөлөл болон Монгол Улсад элэгтэй австрали иргэд багтсан нийт хоёр зуу гаруй хүн оролцсон нь тус ойн арга хэмжээний цар хүрээг илтгэж байв.

Эх сурвалж: ЭСЯ-наас мэдээллээ.