ОБЕГ-ын дэргэдэх Гамшиг судлалын үндэсний хүрээлэн ДХИС-тай хамтран ирэх сарын дөрөвний өдөр гамшигт тэсвэртэй дэд бүтцийн асуудлаар олон улсын эрдэм шинжилгээний хурлыг хийхээр бэлтгэлээ хангаж байна. Энэхүү хурлын анхны шатанд нийт дөчин зургаан бүтээл ирсэн бөгөөд тэдгээрийг мэргэжлийн эрдэмтэн, судлаачдын баг хянаж, аман болон ханан илтгэлийн хэлбэрээр хоёрдугаар шатанд оролцох бүтээлүүдийг шалгаруулжээ. Хуралдааны үеэр сонгон шалгарсан бүтээлүүдийг хэлэлцүүлж, шилдэг илтгэлүүдийг тодруулах ажлыг зохион байгуулах юм.

Нийгэм, эдийн засгийн хөгжил эрчимжиж, хотжилт хурдацтай нэмэгдэж буй өнөө үед хот суурин газрын гамшигт тэсвэртэй байдлыг бэхжүүлэх, барилга байгууламж болон дэд бүтцийн чанар, стандарт, аюулгүй байдлыг дээшлүүлэх шаардлага улам бүр нэмэгдэж байна. Энэ хүрээнд төр, хувийн хэвшлийн хамтын ажиллагааг өргөжүүлэх, хөрөнгө оруулалтыг нэмэгдүүлэхийн зэрэгцээ шинжлэх ухааны байгууллага, эрдэмтэн судлаачдын оролцоо онцгой чухалд тооцогдож байгаа тул энэхүү хурлыг санаачлан зохион байгуулж буйг Онцгой байдлын Ерөнхий газар онцоллоо.

Эх сурвалж: ОБЕГ