УИХ-ын дарга Н.Учралд өнөөдөр Аж үйлдвэр, эрдэс баялгийн сайд Г.Дамдинням Стратегийн ач холбогдол бүхий бүтээгдэхүүний хангамж, нийлүүлэлтийг дэмжих тухай хуулийн төслийг өргөн мэдүүллээ. Энэ хуулийн төсөл нь олон улсын худалдааны нөхцөл байдал, гадаад хүчин зүйлээс хамаарах эрсдэлийг бууруулах, стратегийн ач холбогдол бүхий бүтээгдэхүүний хангамж, нийлүүлэлтийг тогтвортой байлгах, шаардлагатай үед шийдвэр гаргалтыг илүү шуурхай болгох зорилготой.
Сайд Г.Дамдинням танилцуулах үеэр улсын хэмжээнд шатахууны хангамжийг тогтвортой байлгах, үүсэж болзошгүй тасалдлыг урьдчилан сэргийлэх нь бодит шаардлага болсоор буйг онцоллоо. Импортлогч аж ахуйн нэгжүүдэд санхүүгийн дэмжлэг үзүүлэх, нөөцийн савны хүчин чадлыг нэмэгдүүлэх, тогтвортой нөөц бүрдүүлэх шаардлага үүссэн тул энэхүү хуулийн төслийг боловсруулсан байна.
Өнөөдрийн байдлаар Монгол Улс газрын тосны бүтээгдэхүүний хэрэглээгээ бүрэн хэмжээгээр импортоор хангаж байгаа бөгөөд нийгэм, эдийн засгийн өсөлттэй уялдан хэрэглээ жил бүр нэмэгдсээр байна. 2025 оны есдүгээр сарын гучин нэгний өдрийн байдлаар газрын тосны бүтээгдэхүүний импорт хоёр сая хоёр зуун мянган тонн хүрч, өмнөх оноос хорин нэгэн хувиар өссөн нь өсөлтийн эрчим өндөр хэвээр байгааг харуулж байна.
Хуулийн төсөл батлагдсанаар шатахууны хомсдолоос урьдчилан сэргийлэх, нийлүүлэлтийн тогтвортой байдлыг хангах, агуулахын хүчин чадлыг өргөжүүлэх боломж нээгдэнэ. Мөн хангамжийн тогтолцоо сайжирснаар агаарын бохирдол бууруулах, нийгэм, эдийн засгийн өсөлтийг дэмжих үр нөлөөтэй гэж УИХ-ын Хэвлэл мэдээллийн газар мэдээлэв.
Эх сурвалж: УИХ-ын Хэвлэл мэдээллийн газар
