МАН-ын даргаар УИХ-ын гишүүн, Эдийн засаг, хөгжлийн сайд Н.Учралыг сонголоо. МАН-ын даргад УИХ-ын гишүүн, Эдийн засаг хөгжлийн сайд Н.Учрал, МҮХАҮТ-ын ерөнхийлөгч Б.Лхагважав нар нэр дэвшин өрсөлдсөнөөс Н.Учрал Их хурлын 2200 гаруй төлөөлөгчөөс 94.95 хувийн дэмжлэг авч МАН-ын даргаар сонгогджээ.

Н.Учрал эв нэгдлийг хангаж ажиллахын зэрэгцээ "авлига, ашиг сонирхлын хэргүүдэд манай намын чамгүй олон нөхөд нэр холбогдож, баялгийн хараал, авлигын намагт улс, үндэстнээрээ шигдэх аюул ойрхон ирснийг нуун дарагдуулж, хаацайлан хамгаалах эрх хэнд ч байхгүй" хэмээн мэдэгдсэн. Өөрөөр хэлбэл, авлига, албан тушаалын хэрэгт нэр холбогдоод байгаа нэр бүхий улстөрчдийн хувьд хууль хяналтын байгууллагаар шалгуулж үнэн мөнөө тогтоолгосон цагт улс төрийн дэмжлэг хүлээх эсэх нь шийдэгдэх болж байна.

Мөн Н.Учрал нь Их хурлын төлөөлөгчдийн өмнө "Г.Занданшатарын Засгийн газрыг тогтвортой ажиллуулна" хэмээн мэдэгдсэн тул МАН-ын шинэ даргыг эзэнгүй байгаа УИХ-ын даргын албан тушаалд очино гэх таамаг яригдаж байна.  

МАН-ын Их хурал маргааш үргэлжилж, намын үндсэн дүрмийн шинэчлэлийг хэлэлцэнэ.