УИХ-ын чуулганаар Монгол Улсын 2026 оны төсвийг хэлэлцэх үед Төсвийн байнгын хорооны дарга Х.Ганхуяг, Сангийн сайд Б.Жавхлан нарын гишүүд ундааны улаан, ногоон лааз өргөж, УИХ-ын гишүүд ямар санал өгөхийг удирдсан тухай мэдээлэл олон нийтийн сүлжээгээр цацагдсан. Уг асуудалтай холбогдуулан Сангийн сайд Б.Жавхлан байр сууриа илэрхийлжээ.

Б.Жавхлан: 

-"Гишүүдийн хувьд дэмжээгүйг дэмжье гэдэг дээр их будилдаг. Зарим гишүүдийн хувьд зориуд мэдэн будилж байгаа бол зарим нь үнэхээр будилж байна. Үүнээс болоод төсвийн хууль батлагдах эсэх нь эрсдэлтэй байлаа. Тэр дунд төсвийг нураах шахам том дүнтэй гурван ч санал байсан. Байнгын хорооны дарга Х.Ганхуягийн хувьд саналуудаа амжилттай авч гарсан. 

Лаазны асуудал дээр хэлэхэд, миний өмнө ч лааз байсан. Миний хувьд хүнд хоол идээд ундаа уугаад бүгдээрээ л сууж байсан. Азаар миний ард зураг аваад олон нийтийн сүлжээнд байршуулдаг тийм ёс зүйгүй гишүүн байсангүй. Засгийн газраас УИХ-д 2026 оны төсөв өргөн барьснаас хойш  улс төрийн нөхцөл байдал болон багш, эмч нарын жагсаалаас эхлээд цаг үе хүнд байсан. Боловсролын салбарынхан маань төсөв өргөн барихаас өмнө Ерөнхий сайдтай уулзсан. Гэтэл төсөв өргөн барьснаас бараг сарын дараа буюу улс төрийн хүнд нөхцөл байдал үүсэхтэй зэрэгцээд багш нарын цалинг 3.5 сая төгрөгт хүргэх шаардлага тавьсан.

Ингээд төсвийн ерөнхийлөн захирагч нар дахин шинэ хэлэлцээ хийгээд 2026 оны үйл ажиллагааны хөтөлбөрүүдээс 10-15 хувийг хойш нь татаж, танаж Монголын Боловсрол, Шинжлэх ухааны Үйлдвэрчний эвлэлийн тавьсан шаардлагыг биелүүлсэн" гэв.