УИХ-ын чуулганы пүрэв гаригийн үдээс хойших хуралдаан 14:00 цагаас үргэлжлэх ёстой байсан ч УИХ дахь МАН-ын бүлэг дахин завсарлага авч байгааг бүлгийн дэд дарга Ж.Алдаржавхлан мэдэгдэв. Бүлгийн дэд дарга “МАН-ын бүлэг ээлжит бусаар хуралдаж байна. УИХ-ын чуулганы өнөөдрийн нэгдсэн хуралдаанаар хэлэлцэх асуудлаар байр сууриа нэгтгэх шаардлага байгаа учраас завсарлага авч байна” гэв.
УИХ-ын дэд дарга Б.Пүрэвдорж МАН-ын бүлэгт 15:30 цаг хүртэл завсарлага өгөв.
Өнөөдрийн үдээс өмнөх хуралдаанаас УИХ дахь МАН-ын бүлэг Монгол Улсын 2026 оны төсвийн хуультай хамт өргөн мэдүүлэгдсэн төсөл мөн Ухаа худаг ордтой холбоотой асуудлаар Түр хороо байгуулан ажиллах тухай тогтоолын төсөл зэрэгтэй холбогдуулж завсарлага авсан юм.
МАН-ын бүлгийн чуулганы хуралдаанаас авсан хоёр дахь завсарлагын хугацаа дуусч, чуулганы хуралдаан эхлэв. Хуралдаанаар Монгол Улсын 2026 оны төсвийн тухай хуулийн төслийн хамт өргөн мэдүүлсэн хууль, тогтоолын төслүүдийг хэлэлцэж байна.
УИХ-ын гишүүн Дав.Цогтбаатар:
-Эдийн засаг, хөгжлийн яам өөрөө прогноз хийгээд явж байгаа. Алт тогтмол өсөж ирсэн, гэтэл хөрөнгө оруулалт менежментийнхээ компанийг хөдөлгөж чаддаггүй, Засгийн газар дээр ажил хийгдэхгүй байна. Эдийн засаг хөгжлийн яам юу зөвлөдөг юм.
Засгийн газрын хэрэг эрхлэх газрын дарга Н.Учрал:
-Үндэсний баялгийн сангийн тухай хуулиар Хөгжлийн санг Эдийн засаг, хөгжлийн яам хариуцдаг. Хөгжлийн сан ямар төсөл хөтөлбөрийг саэнхүүжүүлэх вэ гэдэг жагсаалтыг УИХ- аар батлуулах хууль эрх зүйн орчинд ажилладаг. Одоо Хөгжлийн сан дээр хуримтлал байхгүй. Д.Цогтбаатар гишүүний хэлж байгаагаар хөрөнгө оруулалтын сангийн жишгээр хөрөнгө оруулалт менежментийн компаниар удирдуулаад эрсдэлгүй хөрөнгөд хөрөнгө оруулах, хувьцаа авах, Засгийн газрын бонд, үнэт цаас авах чиглэлээр ажиллах эрх зүйн орчин бүрдсэн. Гэхдээ Үндэсний баялгийн сангийн тухай хуульд өөрчлөлт оруулж Хөгжлийн санг санхүүжүүлэх зорилгоор хуулийн төсөл дээр ажиллаж байна. Удахгүй оруулж ирнэ.
УИХ-ын гишүүн Ө.Шижир:
-МАН-ынхан төсвөө мартсан уу, ажлаа хийе. Ажилт хаялт зарлаад байгаа юм уу. УИХ дахь МАН-ын бүлгийн 68 гишүүнээс долоо нь л байна. Ажил хаялтаа албан ёсоор зарлах юм уу, цалингаа нэмье гээд байгаа юм уу?
Засгийн газар есдүгээр сарын 1-нд Монгол Улсын 2026 оны төсөв өргөн барьсан, түүнээс хойш 76 хонолоо. 76 хоногийн 56-д нь та нар зодолдлоо. Гурав дараалан ялчихаар "надад хэн хэлж, нохойг хэн саах юм" гэсэн байдалтай ханддаг юм байна. Намынх нь зовлон төрийн зовлон болдог юм байна. Чуулгандаа суухгүй байгаа гишүүдийг дахиж битгий сонгоорой.
