Монгол Улсын Батлан хамгаалах яам болон ХБНГУ-ын Батлан хамгаалах яам урт хугацаанд хамтран ажиллах тухай гэрээг өнөөдөр байгууллаа.
Энэхүү гэрээнд ХБНГУ-аас Монгол Улсад суугаа Онц бөгөөд Бүрэн эрхт Элчин сайд Хэльмут Кулитц, Батлан хамгаалахын сайд Д.Батлут нар гарын үсэг зурсан юм.
Гэрээнд тусгаснаар Германы Холбооны Засгийн газар Монголын Зэвсэгт хүчний сургалт, дадлагын материаллаг баазыг бэхжүүлэхэд нэг сая еврогийн дэмжлэг үзүүлнэ.
Германы талын дэмжлэг нь өмнөх жилүүдэд хийсэн шат дараалсан ажлын үргэлжлэл юм. Тухайлбал, Баян-Өлгий аймаг дахь Монголын Уулын явган цэргийн ангид 1.5 сая еврогийн өртөгтэй бүрэн тоноглосон авиралтын сургалтын заал хүлээлгэн өгчээ. 2009 оноос Германы Зэвсэгт хүчин Монголын Зэвсэгт хүчний алба хаагчдыг төрөл бүрийн чиглэлээр мэргэшүүлэх, дадлагажуулах хамтарсан сургалтыг Монгол Улсад тогтмол явуулж ирсэн. Үүнд, НҮБ-ын ажиллагаанд оролцох бэлтгэл сургалт болон уулын явган цэргийн сургалт багтаж байна.
Хоёр улсын Батлан хамгаалах салбарын хамтын ажиллагаа сүүлийн 15 жилийн хугацаанд хөгжиж ирсэн итгэлцэл бүхий харилцан ашигтай түншлэлд суурилдаг.
Герман Улс бол Монгол Улсын Гадаад бодлогын гуравдагч хөрш юм. Хоёр орны стратегийн түншлэлийн харилцаанд батлан хамгаалах салбар чухал байр суурь эзэлдэг гэдгийг гарын үсэг зурах ёслолын үеэр талууд илэрхийлж байв.
