УИХ дахь Монгол-Германы парламентын бүлгийн дарга Н.Алтаншагай, гишүүд С.Эрдэнэбат, О.Саранчулуун нар энэ сарын 27-нд ХБНГУ-ын Бундестаг дахь Герман–Төв Азийн парламентын бүлгийн дэд дарга Тобиас Винклертэй уулзлаа. Уулзалтын үеэр хоёр орны парламент хоорондын харилцаа, ардчилал, хүний эрх, хөгжлийн бодлогын чиглэлээр хамтран ажиллах талаар ярилцсан байна.
Н.Алтаншагай ХБНГУ-ыг Монголын ардчиллыг дэмжигч гуравдагч хөршийн хувьд онцгой үүрэгтэй гэж онцлон, хоёр орны парламентын харилцаа эрчимтэй хөгжиж буйг дурдав. Тэрээр мөн УИХ-ын Өргөдлийн байнгын хорооны гишүүд саяхан Бундестагийн Өргөдлийн байнгын хороонд зочилж, туршлага судалсныг тэмдэглэсэн байна.
УИХ-ын гишүүн С.Эрдэнэбат Бундестагийн үйл ажиллагааны туршлагаас суралцах зүйл их байгааг онцолсон бол О.Саранчулуун хөгжлийн бэрхшээлтэй иргэдийн улс төрийн оролцоог дэмжих Германы туршлагыг судалсан талаар дурджээ.
Тобиас Винклер Монгол Улс Герман–Төв Азийн парламентын бүлэгт онцгой байр суурь эзэлдэг хэмээн тодотгож, УИХ-ын бүтэц, төлөөллийн өөрчлөлтөд нааштайгаар хандсанаа илэрхийлэв. Тэрээр парламентын төлөөллийн чадавхыг нэмэгдүүлэх чиглэлээр Бундестагийн туршлага, хууль эрх зүйн зохицуулалтын талаар товч танилцуулжээ.
Н.Алтаншагай уулзалтын төгсгөлд Герман-Төв Азийн парламентын бүлгийн дарга Кристиан Гөркийг Монгол Улсад айлчлахыг дахин урьж, хоёр орны хамтын ажиллагаа цаашид бүх салбарт гүнзгийрнэ гэдэгт итгэлтэй байгаагаа илэрхийлсэн байна.
Эх сурвалж: УИХ-ын Хэвлэл мэдээллийн газар.
