Иргэн Цогбадрахын Батболд санаачлан, УИХ-ын гишүүний тэтгэмжийн заалтыг хүчингүй болгох өргөдөл гаргаж, иргэдийн гарын үсгийг цуглуулж эхлээд байгаа.

Улсын Их Хурлын тухай хуулийн 41 дүгээр зүйлийн 41.9 дэх хэсэгт зааснаар “Гишүүний бүрэн эрх дуусгавар болсон бөгөөд тухайн үедээ ажил эрхлээгүй бол 12 сарын хугацаанд УИХ-ын гишүүний үндсэн цалингийн хэмжээнд тэтгэмж олгоно” гэсэн байна.

Өргөдөл гаргагч нь хуулийн уг заалтыг "Энгийн иргэдийн хөдөлмөрийн хөлсний тэгш байдлыг алдагдуулж, давуу байдал олгож байгаа нь нийгмийн даатгал болон бусад тэтгэмжийн хуультай зөрчилдөж, Үндсэн хуулийн тэгш эрхийн зарчимд нийцэхгүй байна" гэж үзжээ.

Өргөдөл нь 100,000-аас дээш хүний дэмжлэг авсан тохиолдолд УИХ-ын холбогдох байнгын хорооноос хэлэлцэж, шаардлагатай бол хуулийн төсөл санаачлах юм.

Өнөөдрийн байдлаар тус өргөдлийг 100.394 иргэн дэмжиж гарын үсэг зурснаар хуулийн төслийг өөрчлөх талаар хэлэлцүүлэх боломж бүрдсэн байна. Мөн уг саналын хугацаа энэ сарын 28-ны 16:03 цагт дуусна.

Та өргөдөлд ЭНД дарж гарын үсгээ зурах боломжтой.