Фижи Улсын Нади хотод үргэлжилж буй ДЭМБ-ын Номхон далайн баруун бүсийн 76 дугаар чуулганы үеэр Монгол Улсын төлөөлөгч Б.Янжмаа уур амьсгалын өөрчлөлт ба эрүүл мэндийн тогтолцооны тэсвэрлэх чадвар, архины хэрэглээний хяналтын асуудлаар Монголын байр суурийг илэрхийлэв.
Тэрбээр Монгол Улс уур амьсгалын өөрчлөлтөд хамгийн өртөмтгий орнуудын нэг болохыг онцлон тэмдэглэж, ган, зуд, тоосжилт нэмэгдсэн нь хүнсний аюулгүй байдал, агаарын чанар, зүрх судас болон сэтгэцийн эрүүл мэндэд сөрөг нөлөө үзүүлж буйг дурдав. Энэ хүрээнд Монгол Улс уур амьсгалд мэдрэг өвчний эрт сэрэмжлүүлэх тогтолцоо байгуулах, хөдөөгийн эрүүл мэндийн байгууллагуудад сэргээгдэх эрчим хүчний шийдэл турших ажлыг эхлүүлээд буйгаа танилцуулжээ.
Мөн архины хэрэглээний эсрэг ДЭМБ-ын “2022–2030 оны үйл ажиллагааны төлөвлөгөө”-г Монгол Улс бүрэн дэмжиж буйгаа мэдэгдсэн бөгөөд Ерөнхийлөгчийн 43 дугаар зарлигийн хүрээнд хэрэгжүүлж буй архины хэрэглээг бууруулах бодлогын талаар мэдээлэв. Тухайлбал, согтууруулах ундааны эргэлтэд хяналт тавих тухай шинэчилсэн хуулиар архины хатуулагт суурилсан шаталсан татварын системд шилжиж, хатуулаг өндөртэй архины татварыг нэмэгдүүлэх, үйлдвэрлэл, худалдаанд тавих хяналтыг чангатгаж буйг онцолсон байна.
Мөн Монгол Улс ДЭМБ-ын Гүйцэтгэх зөвлөлийн гишүүнчлэлд бүс нутгийн төлөөллийг тэгш хангах, жижиг болон дунд орнуудын оролцоог нэмэгдүүлэхийг уриалжээ.
Эх сурвалж: Эрүүл мэндийн яам
