“Орфей” театр энэ намар цагийн үзвэрийн нээлтээ ОХУ-ын Тува Бүгд Найрамдах Улсын нийслэл Кызыл хотын Үндэсний их театрт хийлээ.

“Орфей” театр Хятадын нэрт зохиолч Үй Хуагийн “Амьдрахуй” постдрамын жүжгийг шинэ найруулга, өвөрмөц тавилтаар амилуулж, оюуны өмчөө Тувагийн Үндэсний их театрт олон улсын франчайзын гэрээгээр албан ёсоор худалдсан байна.

Энэ удаагийн намрын нээлтээ ийнхүү анх удаа Хятадын орчин үеийн сонгодог зохиолч болон Монгол найруулагчийн бүтээлээр, Орос, Тува жүжигчдийн оролцоотой тува хэлээр тайзнаа толилуулжээ. Уран бүтээлийг үзэгчид болон мэргэжлийн шүүмжлэгчид өндөр үнэлгээтэй хүлээн авч, Монгол, Орос, Тува, Хятад зэрэг улсын урлагийн гүүрийг холбосон чухал алхам гэж онцолсон байна.

Энэхүү жүжгийн ерөнхий продюсерээр Т.Ариунчимэг, найруулагчаар М.Батболд, ерөнхий зураачаар О.Баярмагнай, жүжгийн зохиолчоор “Тагтаа” хэвлэлийн газрын орчуулагч, яруу найрагч М.Батбаяр ажилласан юм.

Тувагийн Үндэсний их театр 100 орчим жилийн түүхтэй, барилга байгууламж, технологийн дэд бүтэц, уран бүтээлчдийн чадвар чансаагаараа Азидаа тэргүүлэгч театрын нэг бөгөөд дэлхийн шилдэг найруулагч, зохиолч, зураач, жүжигчидтэй хамтран ажиллаж ирсэн баялаг уламжлалтай уран бүтээлийн төв юм.

Ташрамд дурдахад, “Орфей” театр орчин цагийн Хятадын хамгийн алдартай зохиолчдын нэг Үй Хуагийн “Амьдрахуй” романаас сэдэвлэсэн драмын жүжгийг найруулан өнгөрсөн оны 10 дугаар сарын 1-нээс Монголын үзэгчдэд толилуулсан билээ.