Орон нутгийн хүүхдүүдийн саналыг УИХ-аар хэлэлцэхээр болжээ.

Ховд аймгийн Хүүхдийн зөвлөлөөс Тамхины хяналтын тухай хуульд электрон тамхийг хориглох заалтыг тусгах санал гаргаж, дэмжсэн 4826 хүүхдийн гарын үсэг бүхий өргөх бичгийг өнгөрсөн оны 11 дүгээр сард хууль тогтоох дээд байгууллагад уламжилсан байна.

Хүүхдүүдийн энэ санаачилгыг УИХ-ын гишүүн О.Номинчимэг дэмжиж байгаагаа илэрхийлж, энэ сарын 7-нд Ховд аймгийн Хүүхдийн зөвлөлийн гишүүдийг хүлээн авч уулзан, электрон тамхийг хориглох санал бүхий өргөх бичгийг УИХ-ын хаврын чуулганаар хэлэлцэх болсныг дуулгав.

Энэ тухай Ховд аймгийн Хүүхэд, гэр бүлийн хөгжил, хамгааллын газар, Хүүхдийн зөвлөлөөс өчигдөр танилцууллаа.

Судалгаагаар өсвөр насныхан болон залуус электрон тамхи их хэрэглэж байна. Энэ нь хүний эрүүл мэндэд олон сөрөг нөлөө үзүүлж байгаа юм. Иймд электрон тамхины хэрэглээг бууруулах, иргэд, хүүхэд, залуусын эрүүл мэндийг хамгаалах, электрон тамхины хор хөнөөл, ирээдүйд учрах хор хохирлын талаар сурталчлан таниулах зорилгоор дээрх ажлыг эхлүүлжээ.

Улмаар хүүхдүүдээс санал авах ажлыг 2-3 сарын хугацаанд бичгээр болон цахим хэлбэрээр зохион байгуулсан юм.