Эрүүл мэндийн сайд Т.Мөнхсайхан Хан-Уул дүүргийн нэгдүгээр хорооны өрхийн эрүүл мэндийн төвд ажиллаж, эрүүл мэндийн салбар дахь цахим шилжилтийн хэрэгжилт, тулгамдаж буй асуудалтай газар дээр нь танилцлаа. Тэрээр цахим бүртгэл, мэдээлэлжүүлэлтийн тогтолцоо анхан шатны нэгжүүдэд хэрхэн хэрэгжиж буй, улаанбурхан өвчний вакцинжуулалт болон хавдрын эрт илрүүлгийн бүртгэлийн үйл ажиллагаанд ямар хүндрэл гарч байгааг судалж, тодорхой сайжруулалтыг нэн даруй хийхийг холбогдох байгууллагуудад үүрэг болгосон байна.

Тодруулбал, умайн хүзүүний хорт хавдрын эрт илрүүлэг болон хавдрын нэгдсэн цахим мэдээлэл, бүртгэлийн системд тулгарч буй хүндрэлүүдийг түргэн хугацаанд шийдвэрлэхийн тулд Эрүүл мэндийн яам, Эрүүл мэндийн хөгжлийн төв, Эрүүл мэндийн даатгалын ерөнхий газар болон бусад бүх шатны эрүүл мэндийн байгууллагууд хамтран ажиллаж байгаа юм. Сайдын зүгээс мэдээлэл солилцоог сайжруулах, мэдээллийн нэгдмэл платформ бий болгох, шаардлагатай техник тоног төхөөрөмжөөр хангах зэрэгт анхаарч ажиллахыг онцолжээ.

Цаашлаад умайн хүзүүний хорт хавдрын илрүүлэлтийн ажлыг эрчимжүүлэх зорилгоор Дэлхийн эрүүл мэндийн байгууллагын дэмжлэгтэйгээр Хан-Уул дүүрэгт ХПВ-ийн түргэвчилсэн оношлуур нэвтрүүлсэн байна. 30, 35, 40, 45 насны эмэгтэйчүүдийг хамруулсан энэхүү үзлэгт нийт 2462 хүн хамрагдсан бөгөөд 128 тохиолдолд ХПВ-ийн 14 хэв шинжийн аль нэг нь илэрсэн нь урьдчилан сэргийлэх шинжилгээний ач холбогдлыг харуулж байна.

Энэхүү арга хэмжээ нь хорт хавдрыг эрт үед нь илрүүлж, эмчилгээний үр дүнг нэмэгдүүлэх зорилгоор хийгдэж буй бөгөөд иргэдийн эрүүл мэндийг хамгаалах төрийн бодлого бодитоор хэрэгжиж буйн илрэл боллоо.

Эх сурвалж: Эрүүл мэндийн яам