Цаг уур, орчны шинжилгээний газрын харьяа Нислэгийн цаг уурын төв нь олон улсын чанарын удирдлагын тогтолцоо болох ISO 9001:2015 стандартын гэрчилгээг өчигдөр хүлээн авлаа. Энэхүү стандартын хэрэгжилт нь байгууллагын удирдлагын түвшинг олон улсын жишигт хүргэх чухал алхам хэмээн үнэлэгдэж байна.
Нислэгийн цаг уурын төв нь 2013 оноос эхлэн Чикагогийн конвенцын дагуу олон улсын нислэгийн цаг уурын үйлчилгээний хүрээнд ISO 9001:2008 стандартын шаардлагыг ханган анх удаа цаг уурын салбарт чанарын удирдлагын тогтолцоог нэвтрүүлсэн байгууллага болсон юм. Улмаар 2018 оноос шинэчлэгдсэн ISO 9001:2015 стандарт руу амжилттай шилжин ажиллаж иржээ.
Олон улсын чанарын удирдлагын тогтолцоог хэрэгжүүлснээр байгаль орчныг хамгаалах, нэгдмэл удирдлагын тогтолцоог бэхжүүлэх, салбарын менежментийг сайжруулах, ажилтнуудын ур чадвар болон хөдөлмөрийн нөхцөлд эерэг өөрчлөлт авчрах ач холбогдолтойг холбогдох албаны хүмүүс онцолж байна.
Энэхүү гэрчилгээ нь цаашид Монгол Улсын цаг уур, нислэгийн мэдээллийн чанар, хүртээмжийг сайжруулах, аюулгүй байдлыг хангах үйл ажиллагаанд чухал түлхэц үзүүлэх юм.
Эх сурвалж: Цаг уур, орчны шинжилгээний газар
