Боловсролын ерөнхий газар нийгмийн хариуцлагын хүрээнд “Ургана брэнд”-тэй хамтран бага насны хүүхдийн амны хөндийн эрүүл мэндийг дэмжих зорилготой “Эрүүл бяцхан шүд” аяныг албан ёсоор эхлүүллээ. Аяны нээлтийн үйл ажиллагаанд нийслэлийн Боловсролын газар, есөн дүүргийн Боловсролын хэлтэс, төрийн өмчийн цэцэрлэгийн эрхлэгч нар зэрэг нийт 350 төлөөлөгч оролцсон байна.

Аяны хүрээнд хүүхдийн амны хөндийн өвчлөлөөс урьдчилан сэргийлэх, шүдний эрүүл ахуйн мэдлэгийг дээшлүүлэх, “1 шүд угаалт = 250 мл ус” зарчмыг хэвшүүлэх зэрэг олон талт үйл ажиллагаа зохион байгуулагдах юм. Мөн хүүхдийг зөв шүд угаах дадалд сургах, эрүүл мэндийн боловсрол олгох, орчныг тохижуулж, хэрэглэгдэхүүнээр хангах, эцэг эх, багш, асран хамгаалагчдын оролцоог нэмэгдүүлж, харилцан суралцах, туршлага хуваалцах боломжийг бүрдүүлэх чиглэлээр хамтран ажиллана.

Нээлтийн үеэр талууд хамтын ажиллагааны зорилго, үйл ажиллагааны хүрээ, сургуулийн өмнөх боловсролын байгууллагын оролцоо, хамтын ажиллагааны төлөвлөгөө, цаашдын дэмжлэг, хэрэгжүүлэх арга хэмжээний талаар санал солилцсон байна.

Эх сурвалж: Боловсролын ерөнхий газар