Японы Далай тэнгис, хуурай газрыг судлах шинжлэх ухаан, технологийн агентлаг (JAMSTEC) болон дэлхийн бусад судалгааны хүрээлэнгийн эрдэмтэд бичил хуванцрууд далай тэнгисийн зөвхөн гадаргад бус, олон мянган метрийн гүнд хүртэл тархсан болохыг тогтоолоо.

Бичил хуванцар гэдэг нь ихэвчлэн том хэмжээний хуванцар хог хаягдлын задралаас үүсдэг, таван миллиметрээс жижиг хэмжээтэй хуванцрын бичил хэсгүүд юм. Эдгээр нь загас болон бусад далайн амьтад амархан залгих хэмжээтэй тул далайн экосистемд ноцтой сөрөг нөлөө үзүүлж болзошгүйд судлаачид ихээхэн санаа зовниж байна.

Энэхүү судалгаанд 2014-2024 оны хооронд цуглуулсан 1885 судалгааны станцын өгөгдлийг ашиглаж, бичил хуванцрын тархалтын байдлыг нарийвчлан шинжилсэн байна. Түүнчлэн 0.1 мм-ээс бага хэмжээтэй бичил хуванцрууд нь далайн гадаргаас гүн рүү илүү жигд тархах хандлагатай бөгөөд удаан хугацаанд живж, далайн орчинд удаан хугацаагаар нөлөөлдөг болохыг тогтоожээ.

JAMSTEC-ийн судлаач Шие Жао “Далай тэнгис бичил хуванцрын томоохон ‘банк’ болсон тухай судалгааны дүнг хараад үнэхээр цочирдсон. Олон улсын судлаачидтай хамтран бичил хуванцрын тархалтыг судлах арга, мэдээлэл цуглуулах үйл явцыг илүү нэгдсэн хэлбэрт оруулах шаардлагатай” хэмээн онцолсон байна.

Энэ судалгаа нь бичил хуванцрын бохирдлын далай тэнгисийн гүн давхаргад хэрхэн нөлөөлж буйг харуулсан томоохон баримт болж, дэлхийн улс орнуудын анхаарлыг татаж байгаа юм.

Эх сурвалж: NHK