УИХ-ын дарга Д.Амарбаясгалан, УИХ-ын гишүүн М.Мандхай нар Завхан аймгийн Улиастай суманд ажиллаж, иргэдтэй уулзав. Тэд бүс нутгийн хөгжлийн бодлого, дэд бүтцийн төслүүд, орон нутгийн бизнесийн дэмжлэг зэрэг сэдвээр иргэдийн саналыг сонсож, төрөөс хэрэгжүүлэх бодлогоо танилцууллаа.
Дэд бүтцийн төслүүд
Баруун бүсийн хөгжлийг дэмжих зорилгоор энэ онд нийт 115 төсөлд 349.6 тэрбум төгрөгийн хөрөнгө оруулалт хийхээр төлөвлөсөн бөгөөд Завхан аймагт 35 төсөлд 104.9 тэрбум төгрөгийн санхүүжилт хуваарилагджээ.
УИХ-ын дарга Д.Амарбаясгалан бүсийн хөгжлийн цогц төлөвлөлтөд авто замын сүлжээг сайжруулах ажлыг нэн тэргүүнд тавьж буйг онцолсон. Үүнд:
- Улиастай-Алтай чиглэлийн 178 км хатуу хучилттай авто зам
- Улиастай-Цагаанхайрхан чиглэлийн 40 км зам
- Нөмрөг-Сонгино чиглэлийн авто замаас Арцсуурь хилийн боомт хүртэлх 159.5 км зам
- Түдэвтэй (3.6 км), Баянхайрхан (1.5 км), Тэс (1.4 км) чиглэлийн салаа холбоос зам, гэрэлтүүлэг
Арцсуурь боомтыг хөгжүүлэх ажлын хүрээнд орон нутгийн иргэд экспорт, импортын худалдаа хийх боломжтой болж, аялал жуулчлал, бизнесийн өргөжилт, бүтээгдэхүүний үнийн бууралт зэрэг давуу талууд бий болно гэж тооцжээ.
Орон нутгийн хөгжлийн асуудлууд
Иргэдийн санал хүсэлтийн дагуу:
- Аймгийн төвийн номын сангийн барилгыг шинэчлэх
- Ахмадын ордны үйл ажиллагааг өргөжүүлэх
- Нэгдсэн эмнэлгийн тоног төхөөрөмж, өргөтгөлийг шийдвэрлэх
- "Нэг сум-нэг нуур" төслийн хүрээнд Дөрвөлжин сумын Бага нуурын ус ширгэлтийг судлах
- Богд, Чигэстэйн гол дээр хөв цөөрөм байгуулах зэрэг асуудлуудыг хэлэлцжээ.
"Шинэ хоршоо" хөдөлгөөний хэрэгжилт
УИХ-ын дарга Д.Амарбаясгалан, гишүүн М.Мандхай нар Улиастай хотод болсон Хоршоологчдын зөвлөгөөнд оролцож, "Шинэ хоршоо" хөдөлгөөний хэрэгжилт, зээлийн олголт, татвар, даатгалын зохицуулалтын талаар хэлэлцүүлэг өрнүүлэв.
- Улсын хэмжээнд 8971 шинэ хоршоо байгуулагдаж, 88,000 гаруй малчин гишүүнээр элссэн.
- Завхан аймагт 36 тэрбум төгрөгийн санхүүжилт олгожээ.
УИХ-ын дарга хоршоологчдын үйл ажиллагааг тогтвортой үргэлжлүүлэхэд төрөөс бодлогоор дэмжиж ажиллахаа илэрхийлэв. Тэрбээр дундын хоршоог байгуулах, бүс нутгийн онцлогт тохирсон үйлдвэрлэл хөгжүүлэх, нэмүү өртөг шингэсэн бүтээгдэхүүн гаргах, тогтвортой орлого бий болгохыг уриалав.
Эх сурвалж: УИХ-ын Хэвлэл мэдээллийн алба
