Хөгжлийн бэрхшээлтэй хүний эрхийн тухай хуулийн шинэчилсэн найруулгын төслийг өнгөрсөн тавдугаар сард УИХ-д өргөн мэдүүлсэн ч хэлэлцэгдэлгүй үлдсэн тул хууль санаачлагчид нь буцаагдсан. Үүний дагуу Гэр бүл, хөдөлмөр, нийгмийн хамгааллын яам хуулийн төслийг дахин боловсруулж байна.
Хуулийн төслийг сайжруулах ажлын хэсэг
Сайдын тушаалаар хуулийн шинэчилсэн найруулгын төсөл боловсруулах ажлын хэсгийг шинэчлэн байгуулж, олон улсын гэрээ, үндэсний хууль тогтоомжид нийцүүлэн боловсруулах чиглэлээр ажиллаж байна. Ажлын хэсгийн ахлагч Л.Мөнхзул хуулийн төсөлд хүний эрхийн тэгш байдлыг хангах, салбар бүрт хөгжлийн бэрхшээлтэй иргэдийн эрхийг хамгаалахад чиглэсэн төсөв батлан хэрэгжүүлэх, УИХ-д тайлагнаж, хэлэлцүүлэх тогтолцоо бий болгох зэрэг зохицуулалтуудыг тусгах болно гэдгийг онцолжээ.
Хуулийн төслийн гол өөрчлөлтүүд
- Олон улсын хөгжлийн бэрхшээл тогтоох ангилал (ICF)-ыг нэвтрүүлэх
- Монгол дохионы хэл, урлаг, спортын оролцоог нэмэгдүүлэх
- Хөгжлийн бэрхшээлтэй хүүхдийн дэмжлэгийн тогтолцоог сайжруулах
- Хуулийн хэрэгжилт, хяналтын тогтолцоог боловсронгуй болгох
Хуулийн төслийг хаврын чуулганаар өргөн барина
Төслийн боловсруулалт үргэлжилж байгаа бөгөөд хаврын чуулганаар УИХ-д өргөн мэдүүлэхээр төлөвлөжээ. Хуулийн шинэчилсэн найруулга батлагдсанаар хөгжлийн бэрхшээлтэй иргэдийн эрхийг хангах бодлогын хэрэгжилт сайжирна гэж салбарынхан үзэж байна.
