“Тамхины хуулийн хэрэгжилт, тулгамдаж буй асуудал” хэлэлцүүлэг, зөвлөгөөнд Боловсролын сайд П.Наранбаяр, УИХ-ын гишүүд, ДЭМБ-ын Монгол дахь Суурин төлөөлөгч Др Сокорра Эскаланте болон бусад холбогдох албаныхан оролцлоо.
Боловсролын сайд П.Наранбаяр хэлэлцүүлгийн үеэр аливаа хууль, журам олон нийтэд хүрэхдээ тодорхой ашиг сонирхлын бүлгүүдийн эсэргүүцэлтэй тулгардаг ч өсвөр насныхны эрүүл мэнд, амь насанд аюул учруулж буй электрон тамхины хэрэглээтэй тэмцэх нь зайлшгүй гэдгийг онцлов. Тэрбээр уг асуудлыг нарийвчлан судалж, хууль, эрх зүйн орчныг тодорхой болгох шаардлагатайг цохон тэмдэглэлээ.
Тэрээр хэлэхдээ:
ДЭМБ-аас хийсэн судалгаагаар Монгол Улсад өсвөр насныхны тархины хөгжилд электрон тамхины хэрэглээ урт хугацаанд сөргөөр нөлөөлж, эрүүл мэнд, амь насанд нь аюул учруулах эрсдэлтэй болохыг тогтоожээ. Ерөнхий боловсролын 13-17 насны суралцагчдын 24.8 хувь буюу дөрвөн хүүхэд тутмын нэг нь сүүлийн нэг сард электрон тамхи хэрэглэж үзсэн бол 10 суралцагч тутмын нэг нь янжуур тамхи татсан байна.
Электрон тамхи нь орчин үеийн загварлаг бүтээгдэхүүн мэт харагдаж, өсвөр насныхны сонирхлыг ихээр татаж байгаа нь санаа зовоох асуудал болоод байна. Үүнийг анхаарч, 2023 онд НИТХ-ын төлөөлөгчөөр ажиллаж байсан Номинчимэг ажлын хэсгийг ахлан 18 нас хүрээгүй хүүхдэд электрон тамхи болон түүний дагалдах хэрэгслийг худалдаалахыг хориглох Нийслэлийн Засаг даргын захирамжийг гаргуулсан. Мөн Нийслэлийн худалдааны журманд энэ заалтыг оруулж өгсөн нь чухал алхам болсон гэж үзэж байна.
Боловсролын яамнаас 2024 оны сүүлээр боловсролын байгууллагын орчинд электрон тамхи хэрэглэхийг хориглох тушаал гаргаж, үүнтэй холбоотойгоор сургуулийн орчинд электрон тамхи хэрэглэдэг сурагчидтай ганцаарчилсан уулзалт зохион байгуулах, сэтгэлзүйн зөвлөгөө өгөх, сургалт нөлөөллийн ажлуудыг хэрэгжүүлж эхэлжээ.
Электрон тамхины хэрэглээг хязгаарлах үйл ажиллагаа тодорхой сонирхлын бүлгүүдийн эсэргүүцэлтэй тулгардаг ч өсвөр насныхны эрүүл мэнд, амь насны аюулыг үл тоож ухрах ёсгүй. Дэлхий нийтэд тамхины хэрэглээг бууруулах хамгийн үр дүнтэй арга нь татварын өсөлт, сурталчилгааг хориглох, олон нийтийн газарт тамхины хэрэглээг хязгаарлах явдал байдаг. Тамхины эсрэг бодлого хэрэгжүүлсэн улс орнуудад хэрэглээ 20-30 хувиар буурсан судалгаа бий. Мөн дэлхийн 37 улс электрон тамхины худалдааг бүрэн хориглох, эсвэл хатуу хязгаарлалт тогтоосон байна.
