Нийслэлийн Нийтийн Тээврийн Бодлогын Газарт иргэдээс ирүүлсэн санал, хүсэлт, гомдол бүрийг тухай бүрд нь хянан шийдвэрлэх ажил тогтмол хийгдэж байна. Энэ хүрээнд иргэдийн гаргасан талархал болон шүүмжлэлд үндэслэн олон нийтэд мэдээлж эхэлжээ.
Өнгөрсөн амралтын өдрүүдэд иргэнээс ирүүлсэн "Автобусны жолооч буудал дээр хүнээ авахгүй явсан" гэх гомдлын дагуу камерын бичлэг шалгасан байна. Үүний үр дүнд тухайн жолоочийн үйлдэл батлагдаж, 25 нэгж буюу 25,000 төгрөгөөр торгох арга хэмжээ авчээ.
Мөн "Жолооч зорчигчийг замын эргэлт дээр буулгахаас татгалзсан" гэх гомдлыг хянан шалгахад жолоочийн зүй бус харилцаа тогтоогдсон тул түүнд сануулга өгч, зан харилцаагаа сайжруулахыг үүрэг болгожээ.
Нийтийн тээврийн үйлчилгээний чанарыг сайжруулахын тулд иргэдийн санал, гомдол чухал үүрэгтэйг онцолж, 700444040 дугаарт үнэн зөв мэдээлэл өгч хамтран ажиллахыг Нийтийн Тээврийн Бодлогын Газраас уриалж байна.
