Үндэсний цэцэрлэгт хүрээлэнгийн өнөөдрийн байгаа нөхцөлд иргэд, олон нийт шүүмжлэлтэй хандсаар ирсэн. Иргэдэд тав тухай, эрүүл орчинг амласан цэцэрлэгт цэцэрлэгт хүрээлэнгийн байгууламж анхны зориулалтаасаа арай өөр байдлаар ашиглагдаж байгаа нь ч үнэн.  

Тэгвэл энэ удаагийн сонгуульд ХУД-ын ИТХ-ын 6-р тойрогт нэр дэвшигч С.Түвшинжаргал, Ж.Бямбасүрэн, Б.Арсланбаатар, М.Энхсанаа, Л.Оюунбилэг нар Үндэсний цэцэрлэгт хүрээлэнгийн газраас үр хүүхдүүддээ зориулах санаачилгыг гаргаад байна. Товчхондоо, Их Монгол Улсын Гудамжны харалдаа “Үндэсний цэцэрлэгт хүрээлэн”-гийн газраас төв зам дагуух хоёр байршилд хоёрхон га газарт 960 хүүхдийн сургууль, 250 ортой цэцэрлэгийн стандарттай хоёр цогцолборыг хүүхдийн тоглоомын талбайн хамт барьж, байгуулах боломжтой гэж үзсэн  байна.

ХУД нийслэлийн хэмжээнд хамгийн ихээр барилгажиж, төвлөрөл үүссэн дүүрэг хэдий ч улсын сургууль, цэцэрлэгийн хүртээмж маш муу. Төлөвлөгөөгүй барьсан орон сууцны  бөөгнөрлөөс шалтгаалан сургууль, цэцэрлэг шинээр барих газар ч байхгүй. Иймд оршин суугчид хүүхдүүддээ боловсрол эзэмшүүлэхийн тулд хувийн сургуульд сургах, эсвэл харьяа дүүргийн бус, хол байрлалтай сургууль руу хүүхдээ зөөхөөс өөр сонголтгүй байна.

Харин “Үндэсний цэцэрлэгт хүрээлэн” нь Маршалын гүүрний зүүн хойд хэсгээс Баянзүрхийн гүүр хүртэлх ний 973 га газар бүтээн байгуулалт хийгдэхээр төлөвлөгдсөн, газар нутгийн хэмжээгээр Азидаа 6-рт ордог, нийслэлийн ногоон байгууламжийн 23 хувийг дангаар бүрдүүлдэг үндэсний хэмжээний цорын ганц цэцэрлэгт хүрээлэн. Гэтэл энэ их нөөц боломжоос багагүй талбайг зөвхөн хөшөө, барималд зориулаад байгаа. Үүнийхээ оронд ирээдүй хүүхдүүддээ зориулж 2, 3-хан га газар чөлөөлөөд сургууль, боловсролын зорилгоор ашиглуулъя гэдэг санаачлага юм.

Тус байрлалд сургууль, цэцэрлэгийн цогцолбор баригдвал ХУД-ийн хүүхдүүдээс  гадна БЗД-ийн 26-р хорооны хүүхэд багачуудад ч боломж нээгдэх юм. Хоёр цогцолборын голын хэсгээс зам гарсан гүүрэн гарцаар хөдөлгөөний аюулгүй байдлыг шийдвэрлэх бөгөөд хүсэж буй газрын хэмжээ нь хүрээлэнгийн зогсоолын хэмжээнд ч хүрэхгүй юм байна.

Сургууль, цэцэрлэгийн цогцолбор нь хоёр давхар, стандарт хэмжээтэй байх бөгөөд  боловсролын хүртээмжийн асуудлыг ингэж шийдэхээс өөр боломж энэ хавьд үнэхээр байхгүйг нэр дэвшигчид учирлаад энэ талбайд “цорын ганцхан удаа” барилга барьж, энэ төслийг хэрэгжүүлэх нь чухал байгааг онцоллоо.

Тэгвэл иргэн та юу гэж бодож байна? “Үндэсний цэцэрлэгт хүрээлэн”-гийн газраас өчүүхэн хэсгийг үр хүүхдүүддээ зориулах боломжтой юу? Ганцхан удаа шүү дээ...