Хотын дарга Х.Нямбаатар өнгөрсөн амралтын өдрөөр нийслэлийн зам талбай дээр ажиллаж байгаа компаниудын удирдлагуудтай уулзжээ.
Тэр энэ үеэр "Нийслэл энэ онд нийт авто замын 70 гаруй хувийг шинэчилнэ. Өнөөдрийн байдлаар 30 гаруй хувьтай үргэлжилж байгаа, ирэх 11 дүгээр сар хүртэл 65 байршилд авто замыг шинэчилнэ" гэсэн байна. Ингэхэд хотын дарга аа, 11 сар гэдэг чинь өвөл. Өвөр болохоор хүйтэн болдог гэж мэдэх үү? Өвөл тавьсан зам хатах биш, хөлдөнө өө, хөлдсөн хойно эмтэрч, хагарна аа, ингээд үйлдвэрлэлийн гологдол болно. Тэгээд ч өнөөдөр чинь замын шинэчлэл ярьдаг цаг биш, станцуудынхаа бэлэн байдал, дулаан хангамж, өвлийн хэрэглээний цахилгаан, дулааныхаа тухай ярьдаг цаг.
Харамсалтай нь энэ хүн "хот бол зам юм, замыг бол хаанаас нь ч идэж болно" гэдэг ганцхан ойлголттой бололтой. Хот гэдэг их айлд бордюр солихоос чинь ч хүнд ажил, олон асуудал байдаг юм шүү дээ. Тэрний нэг нь удахгүй, ганцхан сарын дараа уугиад эхлэх утаа, хүний аминд хүрдэг шахмал түлшний чинь асуудал байна. Харин энэ хүн наадмын дараанаас л бордюр тавьсан, бордюр ярьсан тэр хэвээрээ өвөлтэй золгох нь байна.
Хуучин цементен бордюр стандартад нийцэхгүй байгаа учраас стандартын бордюраар сольж байгаа гэж хотын дарга ярьсан. "Муу дээр муухай, муухай дээр улцан" гэдэг болж, дотоодын компаниуд нь бордюраа үйлдвэрлэж чадахгүй болсон учраас Хятадаас боржин чулуун бордюр авч байгаа. Ингэхдээ нэг бүр нь 21 юань /10.000төгрөг/-ийн үнэтэй бордюрыг хот 120 мянгаар авсан. За яах вэ, үүнд нь тээвэрлэлт болон замын компанийн ажлын хөлс орсон байлаа байлаа гэхэд 10 нугардаг бизнес гэж байх уу? Зам нь ямар ч стандарт байхгүй, онгорхой, цоорхойгоор дүүрэн байхад бордюрны стандартаар "үхсэн үлийгээ" хийнэ ээ. Бордюраас болж хүн үхсэн үү?
Тэгээд хамгийн эмзэглүүштэй нь "сандартын дагуу бордюр тавьж байгаа" гэж зуныг зусан биеэ өмөөрсөн хотын дарга маань "Стандартыг БХБ-ын сайд даваа гаригт /өнөөдөр/ батална" гэжээ. Өөрөөр хэлбэл, Х.Нямбаатар стандартын дагуу бордюр оруулж ирээд тавиад байгаа хэрэг биш, харин түүний тавьсан бордюрт тааруулж БХБ-ын сайд шинэ стандарт батлахаар болж. Үүнийг чинь тэгээд "эргүү тэнэгийн гай" гэх үү, эрх мэдлээ урвуулсан гэж үзэх үү. Хэзээ байтлаа хотын дарга стандарт зохиодог болчихов?!
Б.ЗАЯА
