Арвайхээр, 2024 оны зургадугаар сарын 11 /МОНЦАМЭ/. Халхын 13 тамгатай хутагтын нэг Эрдэнэ мэргэн ноён хутагт буюу олноо ”Өршөө багш’’ хэмээн нэрлэгдсэн Б.Содномцэрэнгийн аяга аймгийн Музейд хадгалагдаж байна.
Уг аяганы гэрийг төмрөөр битүү хээлж, хоёр талдаа сэнжтэй, нугас, түгжээтэй хийжээ. Тухайлбал, битүү цэцэг, эвэр угалз зэрэг хээгээр өвч чимэглэж, таган дээр норов чаадан хэмээх, их биен дээр найман тахил дүрсийг сийлсэн уран хийцтэй юм.
Өршөө багш 1832 онд Сайн ноён хан аймгийн Ноён хутагтын шавийн нутаг буюу одоогийн Өвөрхангай аймгийн Богд сумын нутаг Солонго хэмээх газар ядуу ард Балигийн гэрт гэрэл цацруулан төрсөн хэмээн түүхэнд тэмдэглэн үлдээжээ.
Түүний аягыг Гучин-Ус сумын харъяат, өндөр настан Бадиахүү хадгалж байсныг аймгийн Музей зохих үнээр авч сан хөмрөгтөө архивлаад байна.
Дээхнэ үед монгол эрчүүд өөрийн хэрэглээний аягаа биедээ авч явдаг байв. Энэ нь хоол унд, аягаар дамжин ирэх элдэв халдварт өвчлөлөөс урьдчилан сэргийлэх зорилготой. Аягыг ихэнхдээ торгоор хийсэн, гоёмсог хээгээр чимсэн уутанд хийж бүсэндээ хавчуулан авч явдаг байжээ.
