Нийслэл нийтийн тээвэрт 600 шинэ автобус авч байгаа ч автобусууд шугаманд бүрэн гараагүй, хүртээмжгүй, иргэд гадаа олон цагаар хүлээж, даарч бухимдсан  хэвээр байна.

Тэгвэл энэ талаар Нийслэлийн Засаг дарга Х.Нямбаатар:

-"600 шинэ автобусаа бүгдийг хүлээн авч дуусч байна. Эндээс 115 автобусыг хувийн гурван компанид өгсөн. Эдгээрийн төхөөрөмж суурилуулах, даатгалын ажил дуусч байгаа. Шинэ автобуснуудаас 130 орчим нь үйлчилгээнд гарахад бэлэн байна.

Өмнө нь 400 автобус аваад эргэн төлөлт огт хийгдээгүй жишгийг хувийн ААН-үүд шаардаад байна. Тиймээс хувийн байгууллагуудаас барьцаа, үйлчилгээний хураамж авч автобуснуудаа долоон жилийн хугацаатай ашиглуулна. Мөн өмнөх өрөө төлөх шаардлага тавьсан. Нийтийн тээврийг хөгжүүлэх санд хувийн компанид өгсөн саарал автобуснуудаас жил бүр 25 орчим тэрбум төгрөгийг төвлөрүүлнэ. Дахин хоёр хувийн компани автобус авах хэлцэл хийж байна.

Нийтийн тээврийн үйлчилгээнд 980 автобус гарах ёстойгоос 880 нь гарсан. 100 гаруй автобусыг ямар нэг байдлаар үйлчилгээнд гаргахгүй байна. Жолооч олдохгүй зэрэг зовлон байна. Дүүргүүдийн хөдөлмөр халамж, үйлчилгээний хэлтсүүдэд автобусны жолоочийг үнэ төлбөргүй сургах сургалт зохион байгуулна" гэжээ.