Хэдхэн хоногийн өмнө болсон хүчтэй дэлбэрэлт, гал түймрийн улмаас олон хүн эрүүл мэнд, эд хөрөнгөөрөө хохироод байна. Галд орон сууцны барилга байгууламж, автомашин “нүүрс” болж хохирлын асуудлыг хэрхэн барагдуулах асуудал хөндөгдөж эхлээд буй. Одоогоор шатсан автомашинуудыг Тээврийн цагдаагийн албаны ойролцоо барлах журмын хашаанд хураасныг NTV телевиз мэдээлжээ.

Дэлбэрэлтийн улмаас 34 автомашин шатсан байна. Өнөөдрийн байдлаар автомашинаа даатгуулсан жолооч нар нөхөн төлбөр авахаар яригдаж, эхнээсээ төлбөр авч эхэлжээ. Хохирогчдын төлөөлөл телевизид ярихдаа  “Төлбөрийг шилжүүлнэ гэж “Тэнгэр” даатгалаас хариу өгсөн” гэжээ. Мөн гурван ч хүн журмын хашаан дахь машинаасаа бичиг баримт болон зургийг нь авахаар ханджээ. Харин шатсан автомашинд хэрэгтэй зүйл нэг ч үлдээгүй аж.

Улсын хэмжээнд 10 автомашин тутмын найм нь даатгалд хамрагдаагүй, хугацаа нь дууссан байдаг аж. Гэтэл найман автомашин тутмын нэг нь ямар нэгэн хэлбэрээр осолд өртдөг байна.

2022 оны байдлаар 120 мянган иргэн ямар нэгэн хэлбэрээр даатгалын сангаас нөхөн төлбөр авчээ. Өнгөрсөн зуны үерээр 100 гаруй автомашин урссан. Гэвч үүний 20 гаруй нь даатгалтай байжээ.

Хэрэв та машинаа банк эсвэл банк бус санхүүгийн байгууллагын зээлээр авсан бол зээл авах үед даатгал хийгдсэн байх ёстой. Хэрэв даатгалын гэрээ нь алга болсон, үерийн усанд устсан, аль эсвэл шатсан  бол банк эсвэл ББСБ-тайгаа холбогдож даатгалтай эсэхээ тодруулах, даатгалын гэрээний мэдээллээ авах боломжтой гэдгийг даатгалын компаниуд зөвлөж байгаа юм.