Өчигдөр шөнө болсон золгүй осол, гал түймэртэй холбоотойгоор Улсын онцгой комисс өнөөдөр хуралдсан. Энэ хуралдаан дээр БШУ-ы сайд Л.Энх-Амгалан нэгэн ноцтой мэдээллийг өнөөдөр хийлээ. Тодруулбал, өнөөдрийн байдлаар нийслэлийн 13 сургуулиас 200 метр дотогш зайд 16 шатахуун түгээх болон авто газ түгээх цэг байрлаж байна гэв.
Эдгээрээс хоёр нь Баянгол дүүрэгт, Баянзүрх дүүрэгт тав, Сүхбаатар дүүрэгт нэг, Багануур дүүрэгт хоёр, Хан-Уул дүүрэгт гурав, Чингэлтэй дүүрэгт хоёр, Сонгинохайрхан дүүрэгт нэг байна.
Мөн төрийн өмчийн бус есөн сургуулиас 200 метрээс дотогш зайд есөн шатахуун түгээх цэг байрлаж байгааг Боловсролын сайд Онцгой комиссын хуралд танилцууллаа. Ингэхдээ,
-“Газ болон шатахуун түгээх цэгт газар олголт хийдэг төрийн байгууллага нь ч тэр, энэ чиглэлийн бизнес эрхэлдэг байгууллагууд ч тэр хүүхдэд ээлтэй шийдвэр гаргадаг, хаана юу барихаа төлөвлөдөг, эрсдэлээ хардаг баймаар байна. Холбогдох яамдад өнгөрсөн хавар албан бичгээр хандсан. Энэ асуудлыг ойрын хугацаанд шийдвэрлүүлж, сургууль, цэцэрлэгийн бүсэд хэт ойртсон газ болон шатахуун түгээх станцуудыг буулгах тал дээр тууштай шахаж, асуудлыг байнга тавьж ажиллана” гэдгээ Л.Энх-Амгалан сайд мэдэгдлээ.
