Ослын дараа Нийслэлийн Онцгой комиссоос авч хэрэгжүүлж байгаа арга хэмжээний талаар Нийслэлийн Засаг даргын хэвлэлийн төлөөлөгч Н.Сугар мэдээлэл хийлээ.

Н.Сугар:

-Нийслэлийн Онцгой комиссын дэд даргаар ахлуулсан шуурхай штаб ажиллаж байна. Эрүүл мэндийн байгууллага 207 оршин суугчдад үйлчилгээ үзүүлсэн. Урьдчилсан байдлаар 62 өрхийн 178 иргэн эдийн засаг, эрүүл мэндээрээ хохирсон гэдэг мэдээлэл ирсэн.  Тийм учраас эдгээр иргэдийн нийгмийн баталгааг хангах асуудал яригдаж байна.

Одоогоор 11 айлын 43 иргэн зочид буудалд байрлаж байгаа. Хэргийн газарт хуулийн байгууллага ажиллаж дүгнэлт гаргасны дараа хохирлыг хэрхэн барагдуулах вэ гэдэг дээр судалгаа хийнэ. Нийт 30 машин шатсан байгаа, зөөвөрлөнө. Осол гарсан газрыг цэвэрлэнэ. Хэргийн газрын үзлэг хийгдэж дууссаны дараа барилга байгууламжийн хийцлэлд мэргэжлийн байгууллагууд шалгалт хийж, цаашдаа ашиглах боломжтой эсэх дээр дүгнэлт хийнэ. Нурах эрсдэлтэй юу, үгүй юу гэдэг дүгнэлт гаргана.

-Энэ хавь маш их халтиргаа гулгаатай байна. Үүнээс болж хоёр машин мөргөлдсөн гэдэг мэдээлэл гараад байгаа. Холбогдох хүмүүст хариуцлага тооцох асуудал яригдах уу?

-Тохижилт үйлчилгээний ажилтан, албан хаагчдыг дүүрэг рүү нь шилжүүлсэн. Дүүргийн зүгээс өдөр бүр халтиргаа гулгааг цэвэрлэх ажлыг хийдэг , давс бодисыг өдөр бүр цацаж ирсэн гэдэг мэдээллийг өгсөн.  Осол гараад хэдхэн цаг болж байна. Ослын шалтгаан нөхцөл юунаас болсныг мэргэжлийн холбогдох байгууллагууд эцэслэн тогтооно.