Баянгол дүүргийн Засаг даргын нэрэмжит ерөнхий боловсролын сургууль, удирдах ажилтан, багш нарын дунд уламжлал болгон зохиогддог “Спорт наадам-2023” амжилттай болж аваргуудаа тодрууллаа. Баянгол дүүргийн Спорт хороонд зохион байгуулагдсан тэмцээнийг Дүүргийн Засаг даргын үүрэг гүйцэтгэгч Д.Жаргалсүрэн нээж нийт багш сурган хүмүүжүүлэгчдэдээ амжилт хүсэж, тэмцээндээ идэвхтэй оролцохыг уриаллаа.

Дэлхийн багш нарын XXIV, Монголын багш нарын 57 дахь өдөрт зориулсан спортын үйл ажиллагаанд дүүргийн ерөнхий боловсролын сургуулийн удирдлагууд болон спортод хайртай хөгжөөн дэмжигчид өргөнөөр оролцлоо. 2023 оны 10 дугаар сарын 14,15-ны өдрүүдэд зохиогдсон спорт өдөрлөг Аэробик, Үндэсний бөх, Гар бөмбөг /эрэгтэй,эмэгтэй/, Сагсан бөмбөг /эрэгтэй,эмэгтэй/ зэрэг дөрвөн төрлөөр зохиогдож тамирчид эрч хүч авхаалж самбаагаа сорилоо. Тус арга хэмжээ нь багш ажилчдыг өргөнөөр оролцуулах, нийтийн биеийн тамираар хичээллүүлж чөлөөт цагийг зөв боловсон өнгөрүүлэх, спортын ур чадвар, багаар ажиллах чадварыг нэмэгдүүлэх зорилготой юм. Тэмцээнд дүүргийн 25 сургуулийн 750 гаруй багш, ажилчид оролцож шилдгүүдээ тодрууллаа.